Կուբան պատրաստ է սեփական արյnւնը թափել ի պաշտպանություն եղբայրական Վենեսուելայի․ ԱԳՆ

Կուբան պատրաստ է սեփական արյունը թափել եղբայրական Վենեսուելայի պաշտպանության համար՝ այդ երկրի դեմ Միացյալ Նահանգների ռազմական գործողությունների ֆոնին։ Այս մասին ասվում է Կուբայի արտաքին գործերի նախարարության կողմից տարածված կառավարության հայտարարության մեջ։

«Այս եղբայրական երկրի և նրա ժողովրդի համար, ինչպես Կուբայի համար, մենք պատրաստ ենք տալ, նույնիսկ մեր սեփական արյունը», - ասվում է փաստաթղթում։

Հայտարարության մեջ Կուբայի իշխանությունները խստորեն դատապարտել են ԱՄՆ-ի ռազմական ագրեսիան Վենեսուելայի դեմ՝ այն անվանելով միջազգային իրավունքը և ՄԱԿ-ի կանոնադրությունը խախտող հանցավոր գործողություն:

Հավանան իրավիճակը համարում է Վաշինգտոնի կողմից Կարակասի վրա ճնշման երկարատև քաղաքականության վտանգավոր սրացում:

Կուբան նաև պահանջել է Վենեսուելայի նախագահ Նիկոլաս Մադուրոյի և նրա կնոջ՝ Սիլիա Ֆլորեսի անհապաղ ազատ արձակումը՝ նշելով, որ ռազմական գործողության արդյունքում նրանց կալանավորումը ՄԱԿ-ի անդամ պետության ինքնիշխանության կոպիտ խախտում է։

Կուբայի արտաքին գործերի նախարարությունը շեշտել է, որ ԱՄՆ գործողությունները նպատակ ունեն վախեցնել ոչ միայն Վենեսուելային, այլև Լատինական Ամերիկայի և Կարիբյան ավազանի այլ երկրներին, ինչպես նաև վերականգնել նրա գերիշխանական նկրտումները տարածաշրջանում։

Հավանան կոչ է արել միջազգային հանրությանը, կառավարություններին, խորհրդարաններին և սոցիալական շարժումներին դատապարտել Վենեսուելայի դեմ ագրեսիան և կանխել նման գործողությունների անպատժելիությունը՝ նախազգուշացնելով, որ տեղի ունեցողը սպառնալիք է ներկայացնում միջազգային խաղաղության և անվտանգության համար: