«Հակառակը պետք է լիներ․Իլհամը՝ նկատելով Նիկոլին, պետք է այծքաղի ոստյուններով վազի ընդառաջ, շողոքորթի, հարցնի տիկինը լա՞վ է, օդանավում հասցրեցի՞ք աչք կպցնել Նիկոլ Վովայեվիչ, մի բան կերե՞լ եք»

Պատմաբան Արեգ Սավգուլյանը ֆեյսբուքյան իր էջում գրել է․ 

 «ՀՀ վարչապետը ինչո՞ւ է պատեհ-անպատեհ շնորհակալություն հայտնում Իլհամ Հեյդարիչին։ Երբևէ մտածել ե՞ք դրա մասին։ Ինձ թվում է հակառակը պետք է լիներ։ Երբ որևէ միջազգային հավաք է լինում Իլհամը՝ նկատելով Նիկոլին, պետք է այծքաղի ոստյուններով վազի ընդառաջ, շողոքորթի, հարցնի ինչպե՞ս եք, ո՞նց եկաք, տիկինը լա՞վ է, օդանավում հասցրեցի՞ք աչք կպցնել Նիկոլ Վովայեվիչ, մի բան կերե՞լ եք։ Ավելին՝ երբ «թավշյա փրկիչը» մոտենում է կլոր սեղանին, Ալիևը աջ ու ձախ կանգնած նախագահներին հրմշտելով, աճպարարական հնարամտությամբ պետք է հասնի Նիկոլի հետևից աթոռը քաշի, որ նա նստի։ Ինչո՞ւ։

Որովհետև շնորհիվ Փաշինյանի ինքը դարձավ Կովկասի մեծ խան, Թուրքիայի գլխավոր վեզիր։ Եվ իր անունը ոսկի տառերով սեպեց Ադրբեջանի անմարմին պատմության մեջ՝ լուծելով անգամ իր հոր Հեյդարի համար բարդ ռեբուսի վերածված Արցախյան հիմնախնդիրը։ Բայց տեսնում ենք հակառակը։ Հայոց անսասան վարչապետը, որը պայքարում է «անհավատների» դեմ երկրի ներսում, դրսում «ռուբինյանական» մաստեր կլաս է ցույց տալիս և սուրճի ռեվերանսներ անում»։