Ադրբեջանը սահմանին օգտագործում է տեղաբնիկ ժողովուրդներին. ադրբեջանագետ

Ղարաբաղա-ադրբեջանական շփման գծում աննախադեպ լարվածության ֆոնին կարծիքներ են հնչում, որ պետք է Ադրբեջանի տեղաբնկի ժողովուրդների ապստամբելու կոչեր անել և համատեղ ուժերով հաղթել թշնամուն: Նշենք նաև, որ տեղեկություններ կան, որ սահմանային բախումների ժամանակ Ադրբեջանն օգտագործում է հենց իր երկրի ազգային փոքրամասնությունների ներուժը:

Խնդրի վերաբերյալ newspress.am-ը զրուցեց ադրբեջանագետ Աշոտ Մովսիսյանի հետ:

Վերջինս նշեց, որ Ադրբեջանի իշխանությունները երկրի տեղաբնկի ժողովուրդների նկատմամբ մտածված և խտրական քաղաքականություն են վարում, կասկած չկա, որ Բաքվի իշխանությունը կանխամտածված ձևով Արցախ-ադրբեջանական սահման և, առհասարակ, հայ-ադրբեջանական այլ թեժ դիրքեր է ուղարկում ծառայելու հենց ազգային փոքրամասնությունների ներկայացուցիչներին։

«Սրանով նրանք փորձ են անում լուծել իրենց համար գլխացավանք հանդիսացող տեղաբնկի ժողովուրդների խնդիրը։ Այս օրերին ընթացող մարտերը ևս դրա մասին են վկայում, համացանցում արդեն իսկ կան տեղեկություններ սպանված թաթ, լեզգի և թալիշ զինվորականների մասին, որի մասին, սակայն ոչ մի կերպ պաշտոնապես չի հայտարարում, անգամ ադրբեջանցիները չեն սիրում հայտնել այդ մասին»,- ասաց նա:

Ինչ վերաբերվում է Ադրբեջանում տեղաբնկի ժողովուրդների պաշտոնական տվյալներին, ապա ադրբեջանագետը նշեց, որ դրանք ոչ մի կերպ չեն համապատասխանում իրողությանը։ Իրականում պաշտոնական Բաքվի ներկայացրած թվերը՝ տեղաբնկի ժողովուրդների վերաբերյալ անհամեմատ քիչ են։

«Այս օրերին ընթացող մարտերի և թեժ իրավիճակի մասին դեռ որևէ հայտարարություն կամ նախաձեռնություն չկա տեղաբնկի ժողովուրդների կողմից, համենայնդեպս, ինձ դեռևս հայտնի չեն։ Բայց կարծում եմ` հնարավոր է, որ Ադրբեջանի տեղաբնկի ժողովուրդների որոշ ներկայացուցիչներ հանդես կգան հայտարարություններով»,- ասաց Աշոտ Մովսիսյանը: