Դատախազը գործարքի՞ է գնացել Դավիթ Սեդրակյանի հետ. ինչի՞ դիմաց և ո՞վ է կազմակերպել Միհրան Հակոբյանի ծեծը

Օրերս մամուլում տեղեկություններ շրջանառվեցին այն մասին, որ քաղաքագետ Միհրան Հակոբյանի ծեծի պատ­մու­թյունից հնարավոր է «տուժի» գլխավոր դատախազ Աննա Վարդապետյանը, և դրվի նրա պաշտոնանկության հարցը։

Ըստ վարկածի՝ Հակոբյանին ծեծի են ենթարկել վերջերս արված, ապա ջնջված մի գրառման համար, որ ԱԱԾ՝ ամուրի տնօրեն Անդրանիկ Սիմոնյանն ու ամուսնացած Աննա Վարդապետյանը սիրային կապի մեջ են։

Չպնդելով, որ Հակոբյանին ծեծի հիմնական դրդապատճառը եղել է հիշյալ գրառումը, այնուամենայնիվ, պետք է նկատել, որ NEWSPRESS.am-ի աղբյուրի փոխանցմամբ, ծեծի «պատվիրատուն»  ՀՀ գլխավոր դատախազ Աննա Վարդապետյանն է:

Մեր տեղեկություններով՝ «կատարողը» եղել է ԱԺ նախկին պատգամավոր Մհեր Սեդրակյանի (Թոխմախի Մհերի) որդին՝ Դավիթ Սեդրակյանը:

Փոքրիկ ակնարկով հիշեցնենք, որ Դավիթ Սեդրակյանն Ազգային ժողով մտավ ընդդիմադիր «Հայաստան» դաշինքով: Սակայն, երբ հասկացավ, որ իր ընդդիմադիր հայացքներն ու պատգամավորական մանդատն ունեզրկելու են իրեն՝ Սեդրակյանը շատ արագ հրաժարվեց և՛ հայացքներից, և՛ մանդատից:

Իսկ պատգամավորը, մեղմ ասած, աղքատ չէր: Ըստ պաշտոնական հայտարարագրի՝ 2021-ին Դավիթ Սեդրակյանի հայտարարագրած գույքի ցանկը ներառում էր շուրջ 34 անշարժ գույք (հողատարածքներ, շենքեր, ավտոկայանատեղիներ և այլն), որոնց արժեքը, հասկանալի է, գերազանցում է մի քանի տասնյակ միլիոն դոլարը։  

Դավիթ Սեդրակյանի կողմից մանդատը վայր դնելը չփրկեց նրա ունեցվածքը բռնագանձումից:

ՀՀ գլխավոր դատախազությունը սկսեց գույքի բռնագանձման գործ։ Այս գործընթացը վերաբերում էր ապօրինի ծագում ունեցող գույքի՝ շոշափելով  մոտ 10–11 միլիարդ դրամի (մեծ մասով՝ անշարժ գույք) բռնագանձման պահանջը։ Ըստ դատախազության և դատարանի նամակագրության՝ մոտ 21 անշարժ գույք Երևանում, ինչպես նաև  Կոտայքի մարզում, մի ավտոմեքենա, մասնակցություն մի քանի ընկերություններում և դրամական միջոցներ ընդգրկվում են բռնագանձման պահանջի մեջ։

Դատախազությունը ներկայացրել է Երևան քաղաքի Էրեբունի վարչական շրջանի Ազատամարտիկների պողոտայում գտնվող հողակտորի շուկայական արժեքի, Սասունցի Դավիթ փողոցում գտնվող 2 անշարժ գույքերի, Դավիթ-Բեկի փողոցում գտնվող 3 անշարժ գույքի, Գաջեգործների 1-ին փողոցում գտնվող անշարժ գույքի, Տիգրան Մեծի պողոտայի նրբանցքում գտնվող 6 անշարժ գույքերի, Գաջեգործների փողոցի անշարժ գույքի, Եկմալյան փողոցի 1/1-րդ շենքում գտնվող 6 տարածքների, Մ. Խորենացու փողոցում գտնվող անշարժ գույքի, Բագրատունյաց փողոցում գտնվող անշարժ գույքի, Կոտայքի մարզի Եղվարդ համայնքի Զովունի գյուղում գտնվող անշարժ գույքի բռնագանձման պահանջ:

Դատախազությունը պահանջում է բռնագանձել նաև 1 տրանսպոտրային միջոց, 8 իրավաբանական անձում մասնակցության և 180 մլն դրամի չափով փոխառության պահանջի իրավունք:

Մի խոսքով, NEWSPRESS.am-ի աղբյուրի փոխանցմամբ, դատախազը Դավիթ Սեդրակյանի հետ գնացել է գործարքի: Ինչպես փոխանցում են մեզ մեր աղբյուրները, Միհրան Հակոբյանին ծեծը կազմակերպելու «վարձավճարը» եղել է բռնագանձված գույքի «վերադարձը» և հայ ու որդի Սեդրակյանի դեմ բացված գործերը «ջրելը»:

Արմինե Մկրտումյան