Կամբոջայի սահմանին տեղի ունեցած մարտերի ժամանակ թայլանդցի զինվորների շրջանում զոհվածների թիվը հասել է 19-ի

Կամբոջայի հետ սահմանային հակամարտության ժամանակ զոհված թայլանդցի զինծառայողների թիվը հասել է 19-ի։

ՏԱՍՍ-ի փոխանցմամբ՝ այս մասին հայտնել է Թայլանդի ցամաքային ուժերի երկրորդ ռազմական շրջանը։

«Բախումները շարունակվում են Տա Կվայի տարածքում և 350-րդ բլուրում։ Մարտերի արդյունքում մեր զինծառայողներից երկուսը զոհվել են», - ասվում է դեկտեմբերի 16-ի արդյունքները ամփոփող հայտարարության մեջ։ Ավելի վաղ հաղորդվել էր, որ թայլանդցի զորքերը վերահսկողություն են հաստատել Սուրին նահանգում գտնվող հին Տա Կվայ տաճարային համալիրի նկատմամբ՝ կամբոջական զորքերը դուրս մղելով տարածքից։

Դեկտեմբերի 7-ին տեղի են ունեցել բախումներ։ Դեկտեմբերի 8-ին Թայլանդի ցամաքային ուժերը հայտնել են, որ կամբոջական զորքերը սկսել են հրետակոծել սահմանային գոտում գտնվող իրենց դիրքերը։ Թայլանդի ռազմաօդային ուժերը պատասխանել են՝ հարձակվելով կամբոջական ռազմական ենթակառուցվածքների վրա։ Կամբոջան այս հակամարտության ընթացքում կորուստների մասին չի հայտնել, սակայն, ըստ Թայլանդի, բախումների ժամանակ զոհվել է ավելի քան 200 կամբոջացի զինծառայող։

Կամբոջայի տեղեկատվության նախարար Նեթ Ֆեակտրան նախկինում հայտարարել էր, որ զոհվել է 15 քաղաքացիական անձ։