Մարդիկ ինձ ասում են՝ տարաք, 7000 երիտասարդի գլուխը կերաք․ ամեն ինչի գնացել ենք հանուն Ղարաբաղի հարցի լուծման․ Փաշինյան

 Գերմանիայում լրագրողների հետ զրույցում անդրադարձել է Ղարաբաղի հարցի լուծմանը։

«Ի՞նչ է նշանակում ասել, որ Ղարաբաղի հարցը չի լուծվել։ Այդ մարդիկ ինձ ասում են՝ տարաք, 7000 երիտասարդի գլուխը կերաք, բա որ Ղարաբաղի հարցը չի լուծվել, ի՞նչ եք առաջարկում։ Ղարաբաղի հարցի շարունակությունը նշանակում է նոր պատերազմ, նոր զոհեր, նոր զրկանքներ, նոր շրջափակում և այլն՝ իր անկանխատեսելի հետևանքով»,- ասել է Փաշինյանը։

Ըստ նրա՝ ովքեր ասում են, որ Ղարաբաղի հարցը չի լուծվել, ասում են, որ Հայաստանը պետք է նոր պատերազմ անի։

«Երբ որ իրենք ասում են՝ Հայաստանում կան ուժեր, որոնք ասում են՝ նոր պատերազմ պետք է անի Հայաստանը, Ադրբեջանն ասում է՝ ուրեմն ռազմական բյուջեները պետք է ավելացնենք, ուրեմն «Արևմտյան Ադրբեջանի» խոսույթ պետք է որդեգրենք։ Ես զերծ էի մնում այսպիսի բացատրություններից, չնայած, ինչո՞ւ էի զերծ մնում, պետք է պարզ, թափանցիկ ամեն ինչի մասին խոսել, որ մարդիկ հասկանան՝ ինչի մասին է խոսքը։ Նրանք, ովքեր ասում են, որ Ղարաբաղի հարցը լուծված չի, նրանք ասում են, որ նոր պատերազմ է պետք։ Ընդ որում, ոչ թե կանխատեսում են, այլ ասում են՝ նոր պատերազմ է պետք։ Մյուս կողմից էլ ասում են՝ Ղարաբաղը տվեց, զոհեր եղան։

Դա ինչի՞ արտահայտությունն է, որ մենք այդ գաղափարին այնքան նվիրված ենք եղել, որ ամեն ինչի գնացել ենք հանուն Ղարաբաղի, բայց այդ ճանապարհին մեր աչքերը բացվել են, մենք շատ բան ենք հասկացել, որ չէինք հասկանում։ Մենք, ի վերջո, պետք է հասկանանք, լավ, ի՞նչը այն չենք անում, որ անընդհատ ողբերգությունների, մաքառումների, կոտորածների, ցեղասպանությունների միջով ենք անցնում։ Հիմա մենք, այո՛, մեր նահատակների կյանքի գնով շանս ենք ստացել՝ փոխելու մեր ճակատագիրը։ Խաղաղությունը հաստատված է, Ղարաբաղի հարցն էլ է լուծված, բոլոր հարցերն էլ լուծված են, Ադրբեջանի հարցն էլ է լուծված, Հայաստանի հարցն էլ է լուծված, տարածաշրջանի հարցն էլ է լուծված, տրանսպորտային կապուղիների հարցն էլ է լուծված, սահմանների սահմանազատման հարցն էլ է լուծված։ Մնում է մնալ այդ լուծումների շրջանակում, մնում է սադրանքների չտրվել և սադրիչ խոսույթներ չորդեգրել»,- հավելել է Նիկոլ Փաշինյանը։