Շենգավիթի ոստիկաններն իրականացրել են հատուկ օպերացիա, որը կրել է «Գիշերային թիթեռնիկին «Ոսկե Գավաթում» թալանել են» անունը

Ինչպես հայտնում է Shamshyan.com-ը, նոյեմբերի 29-ին, ոսիկանության Շենգավիթի բաժնում հերթական օպերատիվ տեղեկություն է ստացվել, որ Երևանի բնակիչ 34-ամյա մի կին իր իրերը, այդ թվում գումարը, վերարկուն մոռացել է «Jeep» մակնիշի ավտոմեքենայում։

Շենգավիթի ոստիկանները ծավալուն աշխատանքի արդյունքում պարզել են, որ նոյեմբերի 28-ին, ժամը 23։50-ի սահմաններում այդ կինը Արշակունյաց պողոտայում նստում է իրեն անծանոթ, սակայն Հայկ ներկայացած վարորդի կողմից շահագործվող «Jeep» մակնիշի ավտոմեքենան, որից հետո միասին ուղևորվում են Արշակունյաց պողոտայում գործող «Ոսկե Գավաթ» հյուրանոց։

Արդեն ներսում իրենց կողմից պատվիրված համարում գարեջուր են խմում, ինչից հետո այդ կինը քնում է։ Ժամեր անց արթնանալուց հետո նկատում է, որ Հայկ ներկայացած անձը հյուրանոցից հեռացել է, իսկ իր բաճկոնի գրպանում եղած 150 հազար ՀՀ դրամն ու «Iphone» և «Nokia» տեսակի բջջային հեռախոսները չկան։

Շենգավիթի ոստիկանները հայտնաբերում են այդ կնոջը, ով անակնկալի է գալիս, ասելով․ «Էդ ոնց իմացաք, որ իմ գլխին սենց օյին ա եկել»։

Դեպքի փաստով ոստիկանության Շենգավիթի բաժնում փաստաթղթեր են կազմվում, որոնք փոխանցվում են ՀՀ Քննչական կոմիտեի Երևան քաղաքի քննչական վարչության Շենգավիթի քննչական բաժին, որտեղ էլ գողություն հատկանիշներով նախաձեռնվում է քրեական վարույթ։

Մինչ քննիչները կլսեին այդ աղջկան, Շենգավիթի ոստիկանները հերթական օպերատիվ տեղեկություններով պարզում են, որ Հայկ ներկայացած անձը իրականում ոչ թե Հայկն  է, այլ Երևանում բնակվող 28-ամյա Նարեկ Մ․-ն, ով իր բնակության վայրի շենքի մոտ հայտնաբերվում և գողություն կատարելու անմիջականորեն ծագած կասկածի առկայության հիմքով ձերբակալվում և տեղափոխվում է ոստիկանության Շենգավիթի բաժին, որտեղից էլ նրան կազմված փաստաթղթերով ներկայացնում են Շենգավիթի քննչական բաժին։

Ֆոտոլրագրողի տեղեկություններով Նարեկ Մ․-ն փաստերի ճնշման տակ խոստովանել է, որ նշված արարքը ինքն է կատարել , իսկ այդ կինը գիշերային թիթեռնիկ է եղել։