Լավագույն բուհերում սովորելու համար զինծառայությունից տարկետում ստացողները պետք է աշխատեն ՀՀ-ում. նախագիծ

Հայաստանում նախատեսվում է փոխել զինվորական ծառայությունից տարկետումներ տրամադրելու կարգը՝ արտերկրի լավագույն համալսարաններում սովորած մասնագետներին Հայաստան վերադարձնելու և նրանց ներուժն օգտագործելու համար։ ԿԳՄՍ նախարարության այս նախագիծն ընդգրկված է Կառավարության այսօրվա նիստի օրակարգում որպես չզեկուցվող։ 

Ըստ նախագծի՝ մինչ այժմ արտերկրի (Շանհայի վարկանիշով) լավագույն 50 համալսարաններում սովորողները կարող էին տարկետում ստանալ զինվորական ծառայությունից։ Այս կարգով արդեն 650 քաղաքացի է տարկետում ստացել, 570 քաղաքացի ներկա դրությամբ դեռ սովորում է և շարունակում է օգտվել տարկետման իրավունքից։ Սակայն, պետության համար կարևոր է, որ այս մասնագետները վերադառնան Հայաստան և աշխատեն գիտության, տնտեսության ու այլ ոլորտներում՝ կանխելով ուղեղների արտահոսքը։

Նոր համակարգով առաջարկվում է տարկետումը տալ այն երիտասարդներին, ովքեր սովորել են աշխարհի լավագույն համալսարաններում և պարտավորվում են վերադառնալ Հայաստան ու որոշակի ժամկետ աշխատել կառավարության կողմից նշված ոլորտներում ու հաստատություններում։

Առաջարկվող փոփոխությունները կտարածվեն նաև ՀՀ կառավարության 2018 թվականի ապրիլի 12-ի N 451-Ն որոշման հավելվածի 9.1-ին կետով սահմանված նվաճումների հիման վրա պարտադիր զինվորական ծառայության զորակոչից տարկետում ստացած և ուսումը ավարտած քաղաքացիների վրա: 

Տարկետում տրամադրելու նախկին պարզեցված կարգը (առանց Հայաստանում աշխատելու պարտականության) կդադարեցվի։