Ընդդիմության դաշտում դեռ խաղում ենք «свой-чужой» խաղը. Աշոտյանը` քաղբանտարկյալների մասին

Եթե նախկինում Հայաստանը թանգարան էր բաց երկնքի տակ, այսօր վերածվել է բանտի՝ բաց երկնքի տակ։ Այսօր ԱԺ-ում «ՀՀ–ում առկա քաղբանտարկյալների և նրանց խախտված իրավունքների վերականգնման մասին» թեմայով խորհրդարանական լսումների ժամանակ այյս մասին ասաց ՀՀԿ փոխնախագահ Արմեն Աշոտյանը։

Նա հավելեց՝ էմոցիաների տակ պետք է չմոռանալ աշխատանքն ու հասկանալ, թե միասին ինչպես է հնարավոր մոտեցնել այն օրը, որ քաղբանտարկյալների նկարները վերածվեն իրական ներկայության։

«Իհարկե, վաղուց այս դահլիճի այս հատվածում (ձեռքով ցույց է տալիս դահլիճի այն հատվածը, որտեղ նստում են կառավարության ներկայացուցիչները– խմբ․) այսպիսի պատկառելի մարդիկ չեն նստել։ Այս մարդկանց նկարները շատ ավելի հնչեղ են, շատ ավելի հայրենասեր, քան 3 շաբաթը մեկ այդ բազկաթոռներում նստող մարդկային, քաղաքական զանգվածը»,- ասաց Աշոտյանը։

Շեշտեց՝ անարդար է, որ այս ամենը կատարվում է, իսկ դրա պատասխանատուները դեռևս չեն ստացել իրենց քաղաքական պատիժը՝ իշխանազրկումը։

Աշոտյանը շեշտեց` մարդկանց անտարբերությունն ու լռությունն է, որ ծնում է քաղբանտարկյալներ։ ՀՀԿ փոխնախագահի խոսքով՝ այսօր անգամ հստակ չգիտենք, թե քանի քաղբանտարկյալ կա մեր երկրում, քանի որ քաղաքական, հասարակական շրջանակների վստահությունը վայելող որևէ անհատ կամ կառույց դեռևս չի հաշվել քաղբանտարկյալների թիվը։

«Դեռևս խաղում ենք ընդդիմության դաշտում «свой-чужой» խաղը՝ «էս իմ քաղբանտարկյալն է, էն իմ քաղբանտարկյալը չէ», լուսաբանման մեջ ենք խաղում, խոսույթի, անգամ այսօր այստեղ մի քիչ խաղացինք, դրա համար ես անուններ չեմ տալու, որովհետև բոլորի անունները տալ հնարավոր չէ»,- ասաց Աշոտյանը։