Հայաստանն ու Ադրբեջանը մերձենում են, Վրաստանը՝ մտահոգություն է առաջացնում. ՆԱՏՕ-ի գլխավոր քարտուղար

ՆԱՏՕ-ի գլխավոր քարտուղար Մարկ Ռյուտեն հայտարարել է, որ դաշինքին միանալ ցանկացող ցանկացած եվրատլանտյան երկիր կարող է պաշտոնապես դիմում ներկայացնել, որից հետո կսկսվի համապատասխան ընթացակարգը։ Այնուամենայնիվ, Ռյուտեն ընդգծել է, որ չի իդեալականացնում Վրաստանում ստեղծված իրավիճակը։

«Մենք խիստ մտահոգված ենք և դա հստակեցրել ենք վրացական կողմին։ Վրաստանի հետ համագործակցությունը կարևոր է ոչ միայն ինքնին, այլև որպես մեր մտահոգությունները փոխանցելու միջոց», - նշել է նա։

ՆԱՏՕ-ի գլխավոր քարտուղարը հատկապես կենտրոնացել է Հարավային Կովկասում ընդհանուր առմամբ տեղի ունեցող զարգացումների վրա։ Ռյուտեն ընդգծել է Հայաստանի և Ադրբեջանի միջև հարաբերություններում դրական փոփոխությունները, նշելով, որ դա հնարավոր է դարձել այդ թվում՝ նախագահ Թրամփի ջանքերի շնորհիվ:

«Վրաստանում և տարածաշրջանում ընդհանուր առմամբ ստեղծված իրավիճակը պետք է դիտարկել ամբողջ Հարավային Կովկասի համատեքստում», - ընդգծել է Ռյուտեն՝ նշելով տարածաշրջանի բոլոր երկրների միջև կայունության և երկխոսության կարևորությունը։