Ուկրաինական բանակը ԱԹՍ-ներով զանգվածային գրոհ է սկսել Ռուսաստանի տարբեր մարզերի ուղղությամբ. ոչնչացվել է 249 ԱԹՍ

Գիշերը Ռուսաստանի Կրասնոդարի երկրամասը ենթարկվել է երկարատև և զանգվածային օդային հարվածի, որի հետևանքով վնասվել է առնվազն 20 տուն:

Այս մասին հայտարարել է նահանգապետ Վենիամին Կոնդրատևը։ «Իրավիճակն առավել ծանր է Նովոռոսիյսկում և Գելենջիկում։ Նովոռոսիյսկում, նախնական տվյալներով, վնասվել է յոթ բնակելի շենք և առնվազն յոթ մասնավոր տուն», - հայտնել է Կոնդրատևը։

«Տարածաշրջանի վեց բնակիչ վիրավորվել է...», - գրել է նա իր Telegram ալիքում։

Ռոստովի մարզի Տագանրոգ քաղաքի վրա գիշերը տեղի ունեցած զանգվածային օդային հարվածի հետևանքով վնասվել են երկու բնակելի շենք, մեկ մասնավոր տուն, քոլեջի շենք, երկու արդյունաբերական ձեռնարկություն և թիվ 7 մանկապարտեզը, հայտարարել է քաղաքապետ Սվետլանա Կամբուլովան։

Ռուսաստանի պաշտպանության նախարարությունը հայտարարել է, որ ժամը 23:00-ից մինչև 07:00-ն ընկած ժամանակահատվածում որսացվել և ոչնչացվել է ուկրաինական 249 անօդաչու թռչող սարք (ԱԹՍ):