Կրեմլը սպասում է «խաղաղության ծրագրի» շուրջ Ամերիկայից ազդանշանի. Պեսկով

Ռուսաստանի և Ուկրաինայի միջև պատերազմը կարգավորելու ամերիկյան «խաղաղության ծրագրի» շուրջ ռուս-ամերիկյան բանակցություններ այս շաբաթ նախատեսված չեն:

Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը։

Նա նաև հիշեցրել է Ռուսաստանի առաջնորդ Վլադիմիր Պուտինի այն հայտարարությունը, որ Մոսկվան բաց է մնում նման շփումների և բանակցությունների համար։

«Սակայն մինչ այժմ բանակցությունների վերաբերյալ որևէ կոնկրետ բան չկա», - հավելել է Պեսկովը։ Նրա խոսքով՝ Մոսկվան դեռևս պաշտոնական տեղեկատվություն չի ստացել Վաշինգտոնից Ժնևում ամերիկյան և ուկրաինական պատվիրակությունների միջև բանակցությունների արդյունքների վերաբերյալ։

«Մենք, իհարկե, ուշադիր հետևում ենք վերջին մի քանի օրերի ընթացքում Ժնևից եկող լրատվամիջոցների հաղորդագրություններին, բայց դեռևս պաշտոնապես ոչինչ չենք ստացել», - պարզաբանել է Ռուսաստանի նախագահի մամուլի քարտուղարը։

Նա նաև նշել է, որ Ռուսաստանը կսպասի Շվեյցարիայում տեղի ունեցած Վաշինգտոնի և Կիևի միջև խորհրդակցությունների արդյունքներին, նախքան ամերիկյան «խաղաղության պլանի» հնարավոր փոփոխությունները գնահատելը։

Պեսկովը հավելել է, որ Կրեմլը որոշ փոփոխություններ է գրանցել Մոսկվա ուղարկված տեքստում։