List.am-ում տեղադրել է երիկամի դոնոր գտնելու միջնորդության հայտարարություն և այդ պատրվակով 2 անձից հափշտակել է 10.8 մլն դրամ

Նոյեմբերի 18-ին Երևանի քրեական դատարանի Աջափնյակ և Դավթաշեն վարչական շրջանների դատախազությունում քրեական գործ է հարուցվել այն անձի վերաբերյալ, ով երիկամի փոխպատվաստման համար դոնոր գտնելու միջնորդ հանդիսանալու պատրվակով երկու տարբեր քաղաքացիներից հափշտակել է 10 միլիոն 800 հազար դրամ։ Գործը նույն օրը մակագրվել է դատավոր Ռազմիկ Մարիկյանին։

 Iravaban.net–ը տեղեկանում  է Դատալեքս դատական տեղեկատվական հարթակից։

Մեղադրական եզրակացության համառոտ բովանդակություն

Հ․Թ․-ին մեղադրանք է առաջադրվել այն բանի համար, որ նա, 2021 թվականի օգոստոսի 27-ին X բժշկական կենտրոնում ենթարկվելով երիկամի փոխպատվաստման վիրահատության և տեղեկացած լինելով’ փոխպատվաստման ամբողջ գործընթացից, խարդախությամբ ուրիշի գույքի խոշոր չափի հափշտակություն կատարելու մեկ միասնական դիտավորությամբ, խաբեության և վստահությունը չարաշահելու եղանակով, այն է’ երիկամի փոխպատվաստման համար դոնոր գտնելու միջնորդ հանդիսանալու պատրվակով համացանցի «Լիստ էյ էմ» կայքէջում զետեղված հայտարարություն տեղադրելու եղանակով, ծանոթացել է հայտարարությամբ նշված հեռախոսահամարներով իրեն դիմած ժ․Ն․-ի հետ և տեղեկանալով’ ժ․Ն․-ի որդու’ է․Ն․-ի երիկամի փոխպատվաստման անհրաժեշտության մասին, նրան խոստացել է որպես միջնորդ, համապատասխան գումարի դիմաց ապահովել դոնորի ժ․Ն․-ի որդու’ է․Ն․-ի երիկամի փոխպատվաստման նպատակով: Իր հանցավոր մտադրությունն իրագործելու և վստահություն ներշնչելու նպատակով Հ․Թ․-ը 29.11.2021 թ-ին Երևան նոտարական տարածքում ժ․Ն․-ից առձեռն վերցրել է 2.500.000 ՀՀ դրամ գումար, ինչը ձևակերպվել է փոխառության պայմանագրի տեսքով և վավերացվել նոտարի կողմից, ինչպես նաև ընթացիկ ծախսեր կատարելու պատրվակով 2021 թվականի դեկտեմբեր ամսին ժ․Ն․-ից վերցրել է 300.000 ՀՀ դրամ գումար, իսկ 15.02.2022 թվականին ժ․Ն․-ից վերցրել է 1.500.000 ՀՀ դրամ և Երևան նոտարական տարածքում ժ․Ն․-ի կողմից ներկայացված Ա․Ա․-ի հետ կնքել է փոխառության պայմանագիր, որը վավերացվել է նոտարի կողմից, սակայն Հ․Թ․-ը՝ խարդախությամբ հափշտակել է ամբողջ գումարը՝ ժ․Ն․-ին պատճառելով ընդհանուր խոշոր չափի’ 4.300.000 ՀՀ դրամի գույքային վնաս:

Բացի այդ, Հ․Ա․Թ․-ը երիկամի փոխպատվաստման համար դոնոր գտնելու միջնորդ հանդիսանալու պատրվակով համացանցի «Լիստ էլ եմ» կայքէջում զետեղված հայտարարություն տեղադրելու եղանակով ծանոթացել է հայտարարությամբ նշված հեռախոսահամարներով իրեն դիմած Գ․Ա․-ի հետ և տեղեկանալով Գ․Ա․-ի մայրիկի’ Ն․Ա․-ի երիկամի փոխպատվաստման անհրաժեշտության մասին, Գ․Ա․-ին խոստացել է որպես միջնորդ, համապատասխան գումարի դիմաց ապահովել դոնորի’ Գ․Ա․-ի մայրիկի’ Ն․Ա․-ի երիկամի փոխպատվաստման նպատակով: Իր հանցավոր մտադրությունն իրագործելու և վստահություն ներշնչելու նպատակով Հ․Թ․-ը, Գ․Ա․-ից 2021 թվականի սեպտեմբերից մինչև 2022 թվականի մարտի 01-ը վերցրել է ընդհանուր 6 500.000 ՀՀ դրամ գումար, ինչի վերաբերյալ 01.03.2022թ-ին Երևան նոտարական տարածքում Հ․Թ․-ի և Գ․Ա․-ի միջև կնքվել է փոխառության պայմանագիր, սակայն Հ․Թ․-ը խարդախությամբ հափշտակել է ամբողջ գումարը’ Գ․Ա․-ին պատճառելով առանձնապես խոշոր չափի’ 6.500.000 ՀՀ դրամի գույքային վնաս:

Մեղադրյալի նկատմամաբ խափանման միջոց կիրառվել է բացակայելու արգելքը։

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով դատարանի օրինական ուժի մեջ մտած դատավճռով։