Ալեն Սիմոնյանի հայտարարությունը վտանգում է ազգային անվտանգությունն ու ստեղծում ավելորդ վախ և անորոշություն․ «Քոչարի» կուսակցություն

«Քոչարի – Ազգային Վերածնունդ և Ազգի Զարթոնք» կուսակցությունը արձագանքել է ԱԺ նախագահ Ալեն Սիմոնյանի կողմից արված հայտարարությանը, որտեղ ԱԺ խոսնակը նշել էր, թե՝ «110 կիլոմետրի չափով մենք ենք իրենց (ադրբեջանցիների-խմբ․) տարածքում»։

«Քոչարի – Ազգային Վերածնունդ և Ազգի Զարթոնք» կուսակցության պատասխան հայտարարության մեջ մասնավորապես ասվում է․

«ՀՀ ԱԺ խոսնակ Ալեն Սիմոնյանի հայտարարության վերաբերյալ

«Քոչարի – Ազգային Վերածնունդ և Ազգի Զարթոնք» կուսակցությունը մշտապես պաշտպանում է պետական պատասխանատվության, ճշգրտության և պետականության արժանապատվության սկզբունքները։ Այդ համատեքստում մենք պարտավոր ենք արձագանքել ՀՀ ԱԺ խոսնակ Ալեն Սիմոնյանի Նոյեմբերի 16 ի 2025 թ այն հայտարարությանը, ըստ որի՝

«Ես քեզ ասում եմ՝ 110 կիլոմետրի չափով մենք ենք իրենց տարածքում»

1. Պետական պաշտոնյան իրավունք չունի տարածել չստուգված և չհիմնավորված տվյալներ

Նման մասշտաբի հայտարարությունները չեն հիմնվում որևէ ներկայացված փաստի, քարտեզագրության կամ պաշտոնական ռազմագիտական տեղեկատվության վրա։ Պետական պաշտոնյան չի կարող թույլ տալ իրեն հրապարակել տվյալներ, որոնք առանց ապացույցի ներկայացվում են որպես «փաստ»։ Այդպիսի մոտեցումը խաթարում է պետական ինստիտուտների նկատմամբ վստահությունը և ստեղծում պետական տեղեկատվական անորոշություն։

2. Հայտարարությունը կարող է վնասել Հայաստանի դիվանագիտական դիրքերին

Նման արտահայտությունները հեշտությամբ կարող են օգտագործվել արտաքին դերակատարների կողմից՝ Հայաստանի բանակցային դիրքերը թուլացնելու համար։

Ավելին՝ «Ես քեզ ասում եմ՝ 110 կիլոմետրի չափով մենք ենք իրենց տարածքում» արտահայտությունը ոչ միայն անհստակ է, այլ նաև տրամաբանական բացեր ունի, որոնք կարող են ընկալվել որպես հայկական կողմի մեղայական ընդունում կամ կեղծ տեղեկատվություն։

3. Պետական գաղտնիքի հնարավոր խախտում

Զինված ուժերի տեղակայման և վերահսկվող հատվածների վերաբերյալ ցանկացած տեղեկատվություն ենթակա է սահմանափակման։

Այս ձևակերպումը—նույնիսկ եթե իրականությանը չհամապատասխանի—կարող է ընկալվել որպես օպերատիվ տվյալ և վնաս հասցնել ռազմական անվտանգությանը։

4. Հանրության մեջ ստեղծվում է ավելորդ վախ և անորոշություն

Սույն հայտարարությունը քաղաքագիտական «Կարմիր ծովատառեխի խաբեության» սկզբունք է և նշանակում է մանիպուլյացաներով շեղել մարտավարություն, կամ էլ կեղծ տեղեկություն տարածել կոնկրետ նպատակների համար։

Անհիմն կամ չափազանցված թվերը՝ առանց բացատրության, ընդունակ են խուճապ առաջացնելու հասարակության շրջանում։ Պետական պաշտոնյան պարտավոր է խոսել պատասխանատվությամբ, ոչ թե հուզական կամ մանիպուլյատիվ ձևակերպումներով։

5. Մեր պահանջները

«Քոչարի – Ազգային Վերածնունդ և Ազգի Զարթոնք» կուսակցությունը պահանջում է․

1. Ալեն Սիմոնյանը հրապարակավ ներկայացնի՝ որտեղի՞ց է ստացել «Ես քեզ ասում եմ 110 կիլոմետրի չափով մենք ենք իրենց տարածքում» տվյալը, և արդյոք այն հաստատված է պետական լիազորված մարմնի կողմից։

2. Պաշտպանության նախարարությունը պաշտոնապես պարզաբանի՝ համապատասխանո՞ւմ է արդյոք այդ հայտարարությունը իրականությանը։

3. ԱԺ-ում ստեղծվի քննիչ հանձնաժողով՝ պարզելու՝ արդյոք հայտարարությունը եղել է անհեռատեսություն, թե որևէ քաղաքական նպատակ է հետապնդել։

4. Կառավարությունը հաստատի հստակ կարգ՝ առանց Պաշտպանության նախարարության և Անվտանգության խորհրդի համաձայնության ոչ մի պաշտոնյա իրավունք չունի տարածքային բնույթի հրապարակային հայտարարություններ անել։

6. Եզրակացություն

«Քոչարի – Ազգային Վերածնունդ և Ազգի Զարթոնք» կուսակցությունը գնահատում է, որ Ալեն Սիմոնյանի՝ «Ես քեզ ասում եմ՝ 110 կիլոմետրի չափով մենք ենք իրենց տարածքում» հայտարարությունը վտանգում է՝

Հայաստանի Հսնրապետության Հիմնական Օրենքի տարածքային ամբողջականության մասին սահմանադրական դրույթները,

ազգային անվտանգության համակարգը,

դիվանագիտական բանակցությունները,

պետական ինստիտուտների նկատմամբ հանրային վստահությունը,

և երկրի միջազգային դիրքը։

Հայաստանի Սահմանադրության անշեղ կատարումը և պետական շահը չի կարող կախված լինել անճշտություններից, անհավաստի հայտարարություններից, կեղծ ու խուճապարար ապատեղեկատվություններից կամ անկառավարելի հռետորաբանությունից։

Մեր կուսակցությունը պարտավորվում է շարունակել պայքարը պետական պատասխանատվության բարձրացման և պետական շահի գերակայության համար»։