Դատախազությունը միջնորդություն է ներկայացրել Արտակ Սարգսյանի նկատմամբ որպես խափանման միջոց կիրառել 2 ամիս տնային կալանք. փաստաբան

Դատախազությունը բողոքարկել է Առաջին ատյանի դատարանի վճիռը և միջնորդություն է ներկայացրել վերանայելու «Քոչարի ազգային վերածնունդ և ազգի զարթոնք» կուսակցության նախագահ Արտակ Սարգսյանի  նկատմամբ կիրառված խափանման միջոցը՝  նրա նկատմամբ դարձյալ կիրառելով տնային կալանք՝ 2 ամիս ժամկետով:

Հիշեցնենք, որ մեկ տարի և 4 ամիս տնային կալանքում գտնվելուց հետո Արտակ Սարգսյանի նկատմամբ կիրառված խափանման միջոցը փոխվել է, և նրա նկատմամբ կիրառվել է  վարչական վերահսկողություն:

NEWSPRESS.am-ի հետ զրույցում Արտակ Սարգսյանի փաստաբան Արա Զաքարյանը նշել էր, որ որոշումը համարում է ոչ իրավաչափ և այն պետք է բողոքարկի:

Պարզվում է՝ դատախազությունում այս որոշումը ևս համարում են «անիրավաչափ»: Բայց, եթե փաստաբանի դիտարկմամբ, որոշումն  անիրավաչափ է, քանի որ հիմնավոր կասկածի բացակայության պայմաններում անձի նկատմամբ կրկին խափանման միջոց է կիրառվել, ապա դատախազությունում հակառակը՝ որոշել են տնային կալանք կիրառվի, որպեսզի «զսպեն» Արտակ Սարգսյանի «անօրինական» գործողությունները:

Թե կոնկրետ ինչ է նկատի ունեցել դատախազությունը՝  «անօրինական գործողություններ» որակմամբ, փաստաբան Արա Զաքարյանը մեզ հետ զրույցում պարզաբանեց, որ դրանք իրականում վերացական դատողություններ են:

«Իբր կարող է խոչընդոտել գործի քննությանը, ապացույցներ կեղծել, ազդել վկաների վրա և նման վերացական բնույթ կրող այսպիսի դատողություններ՝ այն դեպքում, երբ մեկ աձի վերաբերյալ ինֆորմացիա են ներկայացրել, որ արդեն հարցաքննվել է, այն էլ ադ անձը հանդիսանում է  պաշտպանյալիս դուստրը»,-ասաց փաստաբանը:

Հարցին, թե՝ որքանո՞վ է Արտակ Սարգսյանի հասարակական ակտիվությունը ազդել նրա նկատմամբ կիրառված խափանման միջոցի վրա և արդյոք այդ ակտիվությու՞նը չէ պատճառը, որ դատախազությունը  միջնորդություն է ներկայացրել վերանայել վճիռը, Արա Զաքարյանը պատասխանեց, որ իր պաշտպանյալի նկատմամբ հանրային քրեական հետապնդում հարուցելը պայմանավորված էր բացառապես այդ ակտիվությամբ:

 «Արտակ Սարգսյանի իրավունքների իրացմամբ է այդ ամենը պայմանավորված. խոսքի ազատության, հավաքներին մասնակցելու ազատության: Այս պարագայում, երբ Արտակ Սարգսյանն այդ ուղղությամբ գործողություններ է անում՝ դատախազությունը, բնականաբար, ամեն ինչ անելու է, որ փորձի պաշտպանյալիս այդ իրավունքերի իրականացումը սահմանափակել: Դրա համար էլ ես տեսնում եմ դրանց միջև կապը»,-ասաց Արա Զաքարյանը:

Նրա կարծիքով` եթե Արտակ Սարգսյանը ակտիվ գործողություններ չաներ՝ Դատախազությունը հնարավոր է նման միջնորդություն չներկայացներ:

Միաժամանակ, փաստաբանը նկատում է, որ Արտակ Սարգսյանի նկատմամբ հանրային քրեական հետապնդում իրականացնելու ժամկետը կասեցված է և սպասվում է տեղեկատվություն՝ տարբեր պետություններից:

«Այսինքն՝ լրիվ պասիվ, քնած վիճակում է գործը գտնվում, ու թեև իրենք էլ են ասում, որ գործը կանգնած է, բայց, այնուամենայնիվ, համարում են, որ այդ ժամանակահատվածում էլ Արտակ Սարգսյանը պետք է գտնվի տնային կալանքի տակ»,- ասաց փաստաբանը:

Նա նշեց նաև, որ ինքը ևս արդեն բողոքարկել է Առաջին ատյանի դատարանի որոշումը՝ խնդրելով ընդհանրապես վերացնել կալանքը: 

Արմինե Մկրտումյան