330 հազարից ավելի անհուսալի վարկ կա այսօր մեր բանկային համակարգում, դա բարեկեցության անկման ամենամեծ ցուցանիշն է. Արթուր Խաչատրյան

Ներկայացված բյուջեն կարող ենք վստահաբար կոչել ձախողումների ամփոփման բյուջե. ԱԺ ճեպազրույցների ժամին ասաց «Հայաստան» խմբակցության պատգամավոր Արթուր Խաչատրյանը՝ նշելով, որ տնտեսական աճը գահավիժեց 5,2–5,4 տոկոսի միջակայքում, այն դեպքում, երբ խոստացել էին բարենպաստ պայմանների դեպքում 9, իսկ սովորական պայմանների դեպքում 7 տոկոս տնտեսական աճ։

«Այժմ տեսնում ենք՝ կառավարությունն այդ թիրախը չի ապահովում»,–ասաց պատգամավորը։

Ըստ նրա, առկա է պետական պարտքի սրընթաց աճ, որը 2026 թ.-ին անցնելու է 6 տրիլիոնը։

Նա խոսեց նաև միջին աշխատավարձի շեփորահարած աճի մասին. «Եթե միջին աշխատավարձը 300–306 հազարի կարգի է, ապա բնակչության ¾-ը միջին աշխատավարձից ցածր աշխատավարձ է ստանում, այսինքն՝ 4-ից 3-ը միջինից ցածր է ստանում, իսկ սա նշանակում է, որ բևեռացումը մեծացել է, իսկ միջին աշխատավարձին հղումները պարզ մեքենայություն են»,–ասաց նա։

Խաչատրյանը նշեց, որ 330 հազարից ավելի անհուսալի վարկ կա այսօր մեր բանկային համակարգում։ «Չեմ կարող ասել քանի վարկառու կա։ Փոքր վարկերը, եթե 2017-ին ընդամենը 46 000 էին, ապա 2025 թ.-ին չորս անգամ ավելացել են, դա բարեկեցության անկման ամենամեծ ցուցանիշն է»։

Մյուս քաղաքական ուղերձը, ըստ պատգամավորի, ՊՆ ոլորտին հատկացված բյուջեի նվազումն է, և դրան էլ ավելացրած՝ Փաշինյանի ուղերձը, որ «մենք մարտունակ բանակ չենք կառուցելու, մենք կառուցելու ենք պաշտպանունակ բանակ»։

Արցախի հարցում, ըստ նրա, հերթական խայտառակ հայտարարությունն էր, որ Արցախը ֆեյք էր, իսկ նույն ժամանակ Արցախի ղեկավարությանը պատժում են ցմահ ազատազրկմամբ, պատահական մարդկանց՝ մինչև 16–17 տարի։