Ալեն Սիմոնյանը Վազգեն Սաղաթելյանից պահանջում է բռնագանձել 2 միլիոն դրամ ու հրապարակային ներողություն

Ազգային ժողովի նախագահ Ալեն Սիմոնյանը հայց է ներկայացրել Երևանի քաղաքացիական դատարան՝ ընդդեմ «Իմնեմնիմի» հաղորդաշարի համահեղինակ Վազգեն Սաղաթելյանի։

DataLex դատական տեղեկատվական համակարգից հայտնի է դառնում, որ Ալեն Սիմոնյանը Վազգեն Սաղաթելյանից պահանջում է հրապարակայնորեն ներողություն խնդրել սոցցանցի անձնական էջում 5 աշխատանքային օրում և հայտարարության վերնագիրը շարադրել հետևյալ բովանդակությամբ՝ «Ես՝ Վազգեն Արմենի Սաղաթելյանս, ներողություն եմ խնդրում Ալեն Սիմոնյանից: 08․11․2025.-ին ֆեյսբուք սոցիալական կայքի իմ անձնական էջում կատարել եմ hրապարակումներ պարոն Սիմոնյանի վերաբերյալ: Հայտնում եմ, որ hրապարակումներն իրենց մեջ պարունակում են վիրավորական արտահայտություններ Ազգային Ժողովի նախագահ Ալեն Սիմոնյանի վերաբերյալ, ինչի համար ներողություն եմ խնդրում պարոն Սիմոնյանից»: 

ԱԺ նախագահը նաև պահանջում է բռնագանձել 2 միլիոն դրամ՝ հրապարակումների մեջ պարունակվող վիրավորանքի համար նախատեսված փոխհատուցում, 530 հազար դրամ դատական ծախսերի հատուցում, որից 480.000-ը՝ փաստաբանի վարձատրության գումար, 50.000-ը՝ պետական տուրքի գումար:

Հիշեցնենք՝ ԱԺ նախագահ Ալեն Սիմոնյանի ներկայացրած հաղորդման հիման վրա ԱԱԾ դիմակավորված անձինք այսօր ձերբակալել են «Իմնեմնիմի» փոդքասթի հեղինակներ Վազգեն Սաղաթելյանին և Նարեկ Սամսոնյանին։

Նախաձեռնված քրեական վարույթի շրջանակներում կատարվում են անհետաձգելի քննչական գործողություններ, նրանց, ամենայն հավանակությամբ, կկալանավորեն։