Ինձանից ի՞նչ եք ուզում. ՔԿ նախագահը՝ Բագրատ Սրբազանի գործի մասին

«18 անձ կալանավորված է։ Պատասխանատու պաշտոն զբաղեցնելով, ունենալով ամբողջական ինֆորմացիա ձեր ձեռքի տակ, բայց նախընտրել եք քաղաքական դրդապատճառներով, քաղաքական  ենթատեքստով մեկ  նախադասություն հանել և ժողովրդին ահաբեկել, որ այս մարդիկ պատրասվում են ձեզ գյուլել, միայն թե իշխանություն վերցնել»,- ԱԺ-ում  2026 թվականի բյուջեի նախնական քննարկման ժամանակ Բագրատ Սրբազանի և մյուսների գործի վերաբերյալ ասաց «Հայաստան» խմբակցության պատգամավոր Աննա Գրիգորյանը՝ դիմելով քննչական կոմիտեի նախագահ Արթուր Պողոսյանին։

Ընդդիմադիր պատգամավորը հետաքրքրվեց, արդյո՞ք Ա. Պողոսյանը պատրաստվում է ժողովրդի առաջ ներողություն խնդրել, իսկ եթե ոչ, խնդրեց ասել, թե ինչու են կոնտեքստից կտրված ներկայացրել խոսակցությունը։

Ա. Պողոսյանն ասաց, որ հանրության մոտ թյուր կարծիք չձևավորեն այս գործի հետ կապված։

«Պաշտպանության մարտավարության տեսանկյունից հասկանում եմ՝ փորձում են առավելապես նսեմացնել քրեական վարույթով ձեռք բերված այն ապացույցները, որոնք հիմնավորում են մեղքը։

Ես Հանրային հեռուստաընկերությամբ հարցազրույցի ընթացքում ինչ ասել եմ՝ հաստատում եմ։ Այսօր կենտրոնացել եք գյուլելու դրվագին։ Ինձանից ի՞նչ եք ուզում, այդ գյուլելու թիրախների փնտրտուքների մե՞ջ ենք հիմա մենք, թե ո՞ւմ պետք է գյուլեին պատերի տակ։ Հիմա ձեր հարցին ի՞նչ պատասխանեմ։

Եղե՞լ է նման խոսակցություն՝ պատերի տակ գյուլելու։ Եղել է նման խոսակցություն։

Մենակ գյուլելու խոսակցությունն եք վկայակոչում, բա մյուս խոսակցություննե՞րը։

Ախր դուք տեղյա՞կ եք, որ էդ գործով իր ձեռքով գրած ապացույցներ կան, որ  արարքի որակումն ինքն իրան տվել է՝ ահաբեկչություն, պլանավորված ահաբեկչություն։

Չեմ ուզում առաջ ընկնել»։