Կոնդեցիներին հերթական անգամ խաբեցին

Վաղը՝ ապրիլի 2-ին կոնդեցիները դարձյալ ակցիա կկազմակերպեն կառավարության շենքի դիմաց:
Արդեն մի քանի օր է Կոնդի բնակիչները փորձում են հանդիպել վարչապետին՝ իրենց խնդիրը ներկայացնելու և կառավարության ղեկավարից պատասխան ստանալու համար, սակայն ամեն անգամ նրանց խոստումներով տուն են ուղարկում հենց կառավարության մոտից:

Նկատենք, որ նախորդ շաբաթ կոնդեցիները փակեցին Հանրապետության հրապարակից Տիգրան Մեծ պողոտա մտնող ճանապարհահատվածը և պահանջեցին հանդիպում վարչապետի հետ:

Ոստիկանները թեև խոստացան նրանց այդ հանդիպումնը, սակայն մինչ օրս հանդիպումը չի կայացել և նրանց ոչ-ոք հստակ պատասխաններ չի տվել: Ամեն օր նրանց տուն ուղարկելով՝ հաջորդ օրվա համար հանդիպում են խոստանում:

«Վաղը աշխատանքային շաբաթ է, կազմակերպելու ենք նորից հավաքներ: Էնքան ենք հավաքվելու, մինչև հանդիպենք վարչապետին: Արդեն հոգնել ենք: Ինչքան կարելի է առանց տուն մնալ»,- newspress.am-ի հետ զրույցում ասաց Կոնդի նախկին բնակիչներից Մարիամը՝ հավելելով, որ իրենց ամեն անգամ խաբում, տուն են ուղարկում:

Նկատենք նաև, որ վարչապետի խորհրդական Հայկ Դավթյանը Կոնդի բնակիչների հետ հանդիպումների ժամանակ ասել է, թե փող չկա և իրենք պատասխանատու չեն:

«Խելացի լինեիք՝ գումարը վերցնեիք, բնակարանային պայմանագիր չկնքեիք: Դատարան էլ դիմեք, մենք պատասխանատու չենք»,-ասել է նա:

Հիշեցնենք, որ արդեն 10 տարի Կոնդի 350 ընտանիք կառավարությունից փոխհատուցում են պահանջում իրենց քանդված տների դիմաց: Սակայն մինչ օրս նրանց բողոքի ձայնը մնացել է անարձագանք: