Օրենք կա, սակայն ծննդատներում դեռևս առաջարկում են մանկական կաթնախառնուրդներ

Հաճախ է պատահում, որ ծննդաբերությունից հետո մայրական կաթը ուշանում է, կամ չի հերիքում փոքրիկին: Մասնագետները եկել են այն եզրակացության, որ մայրական կաթն անփոխարինելի է և որևէ, անգամ լավագույն կաթնախառնուրդ չի կարող փոխարինել մայրական բնական կաթին:

Վերջին տասնամյակներին արհեստական կաթնախառնուրդներ արտադրող միջազգային ճանաչում ունեցող ընկերություններն իրենց արտադրատեսակներով հեղեղել էին աշխարհը՝ համոզելով, որ մայրական կաթին հնարավոր է փոխարինել արհեստական կերով, որը գրեթե մոտ է մայրական կաթին:

Աշխարհի շատ երկրներում մայրական կաթով սնուցման առավելությունների, նաև այդ առավելություններն օրենքով ամրագրելու ուղղությամբ են շարժվում:

Հայաստանում արդեն տևական ժամանակ, տուրք տալով ժամանակակից հովերին, մայրիկները գերադասում են կաթնախառնուրդներ տալ երեխաներին՝ ելնելով տարբեր պատճառներից՝ կազմվածքը պահպանելուց մինչև կրծքի կաթ չունենալը:

Սակայն վերջին տարիներին Հայաստանում քարոզարշավ է սկսվել մայրական կաթով կերակրելը խրախուսելու համար, այս առումով բավականին աշխատանք տարվեց, սակայն այդպես էլ հնարավոր չեղավ արմատախիլ անել կաթնախառնուրդներ ներկրող ընկերությունների ախորժակը:

Այժմ էլ մասնավորապես երևանյան ծննդատներում, եթե մայրիկի կաթն ուշանում է, կամ մայրիկը մի փոքր երկար է քնած մնում, ապա փոքրիկին արդեն կերակրած հանձնում են մորը:

Օրերս կառավարության նիստից հետո, լրագրողները ՀՀ առողջապահության նախարար Արմեն Մուրադյանից հարց են ուղղել, թե ինչու մայրերին կաթնախառնուրդներ են առաջարկում հատկապես այն ֆիրմաներից, որոնք ԱԺ պատգամավոր Սամվել Ալեքսանյանին և ԴԱՀԿ պետ Միհրան Պողոսյանին պատկանող ընկերություններն են ներկրում, արդյոք այդ հարցով նախարարությունը զբաղվել է: Ա. Մուրադյանն ասել էր, որ բրենդային ընկերությունների վերաբերյալ հարցերին ինքը միայն գրավոր կպատասխանի, քանի որ պետք է հարցն ուսումնասիրվի. «Որևիցե բրենդային խնդիր չէի ուզենա մեկնաբանել: Կառավարության որոշումով բոլոր հնարավոր սննդի տեսակները, փոխարինիչները կարգավորվելու են Առողջապահության նախարարության կողմից, որն արդեն կբացառի ոչ մասնագիտական պարզաբանումները»:

Նշենք, որ կաթնախառնուրդ ներկրող ընկերությունները զանազան միջոցներով շահագրգռում են բուժաշխատողներին՝ մայրիկներին առաջարկելու կաթնախառնուրդներ:

Նշենք, որ «Hipp» արտադրատեսակը ներկրում է «Ալեքս Գրիգ»-ը, «Սլավեքս» ՍՊԸ-ն` «Վիննի», «Նուտրիլակ» ապրանքատեսակները, «Նյու Ֆորս» ՍՊԸ-ն` «Nestle», «Nestle Junior», «Nestogen», «ՆԱՆ» ապրանքատեսակները: «Բեյբի-Սիմ» ՍՊԸ-ն ներկրել է «Սիմիլակ» ապրանքատեսակը, «Վիվաֆարմ» ՍՊԸ-ն` «Ագուշա» ապրանքատեսակը, «Բրենդ Լիդեր» ՀՁ ՍՊԸ-ն` «Heinz» ապրանքատեսակը, «Սլավ Գրուպ» ՓԲԸ-ն` «Nutrilon» ապրանքատեսակը:

Հիշեցնենք, որ 2015 թ-ին մարտի 1-ից ուժի մեջ է մտել «Երեխաների կրծքով սնուցման կարգավորման և մանկական սննդի շրջանառության մասին» օրենքը, սակայն այսօր էլ հատկապես մայրաքաղաքի ծննդատներում և պոլիկլինիկաներում մայրիկներին առաջարկվում են արհեստական կերեր և նախարարությունը այս խնդիրը լուծել դեռևս չի կարողանում: