Սպիտակ տունը չի բացառում Թրամփի և Պուտինի միջև ապագայում հանդիպումը

Դոնալդ Թրամփը հույս ունի, որ ապագայում Ռուսաստան-Ուկրաինա հակամարտությունը լուծելու համար Պուտինի հետ հանդիպումը դեռ կկայանա։ Այս մասին մամուլի ասուլիսի ժամանակ հայտարարել է Սպիտակ տան մամուլի խոսնակ Քերոլայն Լիվիտը։

«Այս երկու առաջնորդների հանդիպումը ամբողջությամբ դուրս չի եկել օրակարգից։ Կարծում եմ՝ նախագահը և ամբողջ վարչակազմը հույս ունեն, որ դա կարող է տեղի ունենալ մի օր, բայց մենք ուզում ենք վստահ լինել, որ հանդիպումը կունենա շոշափելի, դրական արդյունք», - ընդգծել է նա։ Լիվիտը նշեց, որ ԱՄՆ պետքարտուղար Մարկո Ռուբիոյի և Ռուսաստանի արտգործնախարար Սերգեյ Լավրովի միջև հեռախոսազրույցը միակ պատճառը չէր, որ Թրամփը զգաց, որ հիմա Պուտինի հետ հանդիպելու ժամանակը չէ։ Նրա խոսքով՝ Թրամփը դժգոհ է երկու կողմերի հակամարտության կարգավորման տեմպերից։ Դրա մասին վկայում են ԱՄՆ-ի կողմից նախօրեին կիրառված հակառուսական պատժամիջոցները։

Սպիտակ տան խոսնակը նաև հայտարարել է, որ ռուսական նավթային ընկերությունների նկատմամբ երեկ կիրառված սահմանափակումները, ենթադրաբար, էական ազդեցություն կունենան Մոսկվայի վրա։