Ոչ մի բարոյական իրավունք չունեք հանդիմանելու հայ կնոջը. բաց նամակ՝ տեսանյութի հեղինակ թուրք երիտասարդին

«Քոչարի ազգային վերածնունդ և ազգի զարթոնք» կուսակցության վարչության անդամ Կարեն Կտրակյանն անդրադարձել է թուրք բլոգերի տեսանյութին, որտեղ վերջինս սրտնեղել էր, որ NEWSPRESS.am-ի հիմնադիր տնօրեն Արիանա (Արմենուհի) Հովսեփյանը ուտում և զզվանքով թքում է թուրքական արտադրության լոխումը:

Կարեն Կտրակյանը բաց նամակ է ուղղել տեսանյութի հեղինակ, ազգությամբ թուրք երիտասարդին։

Նա մասնավորապես գրել է.

«Օրերս համացանցում տեսա Ձեր տեսանյութը, որտեղ դուք թուրքական ակցենտով, ոչ գրական (հետաքրքիր է, թե որտեղ են այդպես վարժեցրել), բայց վարժ հայերենով հանդիմանում եք հայտնի հայուհի, բլոգեր Արիանա Հովսեփյանին՝ իր կողմից տեղադրած մի տեսանյութի պատճառով, որը վերաբերվում էր անմիջապես մեր հայկական ներքին քաղաքական թեմային։ Ակամայից ուշադրությունս գրավեց Ձեր հայերենով արտաբերվող մտքերի շարանը։ Մարդ կարող է սովորել օտար լեզու, երբ ընդունում, հարգում է այդ լեզվի մշակույթը կրող ժողովրդին։ Կամ էլ լեզվին տիրապետելը կարող է ունենալ հեռու գնացող, հնարավոր է, թշնամական գործունեություն իրականացնելու նպատակներ։ Ձեր պարագայում, դուք արտաբերեցիք հետևյալ արտահայտությունը՝ ուղղված հայ ժողովրդին։ Ցիտում եմ Ձեր բառերը նույնությամբ. «Դո՛ւք, հայերդ, տարիներ շարունակ ապրել եք թուրքական հողերում, կերել եք թուրքերի հացը, խմել եք նրանց ջուրը։ Էդ ժամանակ ամեն ինչը լավ էր, հիմա վատը դարձա՞վ, հա՞»:

Այս արտահայտությունից հետո մնացածն արդեն լսելու իմաստ էլ չկար։ Հասկանում եմ, որ որպես թուրք պատրիոտ, դուք վիրավորվում ու պաշտպանում եք Ձեր երկրի արժանապատվությունը, ինչը գովելի է և հասկանալի։ Բայց դուք ինքներդ արդեն վիրավորում եք իմ ազգային արժանապատվությունը ու արդեն խոսելու հերթը իմն է։ Կպաշտպանեմ Արիանային ու կբացատրեմ նրա արարքը մի փոքր ավելի ուշ։ Ինչպես դուք Ձեզ կոռեկտ և պատշաճ պահեցիք, այնպես էլ ես չեմ անցնի կոռեկտության սահմանները։ Շատ վատ է, որ դուք դեռ չգիտեք՝ հայե՞րն են թուրքական հողերում ապրել, թե՞ թուրքերն են հիմա ապրում հայկական և հունական հողերում, որը ներկայիս Թուրքիայի ամբողջ տարածքն է։ Դուք դա իրոք չգիտե՞ք, թե՞ ձեր դպրոցներում այդպես են կրթում նոր սերունդներին:

Թե՞ գիտեք, բայց ուրանում ու մերժում եք իրականությունը՝ փորձելով Ձեզ ներկայացնել քաղաքակիրթ ազգի ներկայացուցիչ։ Մոռացե՞լ եք, թե՞ չգիտեք աշխարհի որ ծայրից են քոչել դեպի մեր տարածաշրջան ձեր նախնիներն իրենց յուրտերով ու անասուններով՝ գրավելով երբեմնի քաղաքակրթության օջախ հանդիսացող երկրների տարածքները։ Ձեր ներկայիս երկրի տարածքի ամեն մի քառակուսի մետրը պեղելուց հայտնաբերվում են հիմնականում հայկական և հունական մշակույթի ժառանգություն հանդիսացող մասունքներ և իրեր, որոնք ապացուցում են, թե ով է ում հողն ու ջուրը շահագործում ներկայումս։ Թերևս, եթե ազնիվ լինենք ինքներս մեզ հետ, մի գուցե և կարելի է ինչ-որ տեղ շնորհակալ լինել Օսմանյան միապետներից, որոնց կառավարման հարյուրամյակների ընթացքում թուրք, հայ, ասորի, հույն, եզդի, քուրդ և այլ ժողովուրդներ խաղաղ ապրել և արարել են, զարգացրել մշակույթը, հողագործությունը, քաղաքաշինությունը այն կայսրության, որի հպատակները, որ հանդիսացել են։

Սակայն ամեն ինչ գրեթե նորմալ էր ընթանում մինչև այն ժամանակ, երբ, չգիտես թե ինչու, օսմանները ընդունեցին ոմն հրեա Սաբիթայ Ցվիյի ուսմունքը և վերածվեցին թուրքերի։ Ի դեպ, մինչ այդ թուրք բառով օսմանները վիրավորում էին հանրության անարժան, արհամարված նվաստացված մարդկանց։ Սուլթան Աբդուլ Համիդի երկրորդի օրոք 1894-1896թ.թ-ին Օսմանյան կայսրության հայաբնակ վայրերում սկսվեցին մասսայական հայերի ջարդեր, որոնք պարբերաբար հետագայում շարունակվեցին առաջին համաշխարհային պատերազմի ժամանակ երիտթուրքերի ղեկավարմամբ ու հետո մինչև Խորհրդային կարգերի հաստատումը և Հայկական ՍՍՀ ի ստեղծումը։ Այսպիսով դուք՝ թուրքերդ, քրդերի հետ միասին կոտորեցիք և ցեղասպանության ենթարկեցիք տեղացի էթնիկ ժողովուրդներին, այդ թվում միլիոնավոր հայերի։

Իր բազմահազարամյա պատմության ընթացքում շատ նվաճողների, ասորիների, պարսիկների, հույների, հռոմեացիների, արաբների, մոնղոլ թաթարների ու թուրքալեզու ցեղախմբերի հետ է առերեսվել ու պատերազմել հայ ժողովուրդը։ Բայց երբեք ոչ մի այլ նվաճող ազգ այդպես հիմնահատակ, մեծից փոքր չի ցեղասպանել ու արտաքսել իր հայրենի բնօրրանից իմ ազգին, ինչպես վարվեցիք նախորդ դարասկզբին դուք՝ թուրքերդ։ Չեմ ուզում շատ խորանալ պատմության էջերում։ Բայց քանի դուք՝ թուրքերդ, չեք ճանաչում Ձեր նախնիների կատարած անմարդկային ոճրագործությունները, ցեղասպանությունը քրիստոնյա ազգերի և եզդիների նկատմամբ, քանի դուք մերժում եք իրական համաշխարհային ակադեմիական պատմությունը, փոխում եք աշխարհագրական տեղանունները, յուրացնում եք հայկական և հունական մշակույթը, դուք ոչ մի բարոյական իրավունք չունեք հանդիմանելու հայ կնոջը, որը մերժում է ամեն թուրքականը։ Եվրոպացիներն էլ, գրավելով ու տիրանալով հարավային ու հյուսիսային Ամերիկաներին, գրեթե լիովին վերացրեցին տեղի բնակչությանը։

Սակայն ոչ մեկ մինչև այսօր չի յուրացնում ու ոտնձգություն անում հնդկացիների մշակույթի նկատմամբ այնպես, ինչպես դուք եք վարվում հայկական և հունական եկեղեցիների հետ՝ վերածելով լավագույն դեպքում մզկիթների, եթե ոչ՝ անասնագոմերի։ Ու սրա՞ համար ես, Արիանան, հայ ժողովուրդը պետք է շնորհակալ լինենք Ձեզ, թուրքերիդ: Եվ ինչպե՞ս պետք է վերաբերվի թուրքական «փաշօղլի» լոխումին Արիանան, որի անունը ասոցացվում է այսօրվա ամենամեծ դավաճան հայի հետ: Ինչպե՞ս պետք է վերաբերվի Արիանան թուրքերին, երբ նրա պապերի ու տատերի ընտանիքները, ցեղասպանության են ենթարկվել, կորցրել պապերին ու տատերին, հայրերին ու մայրերին, քույրերին ու եղբայրներին, տղա և աղջիկ երեխաների։

Եվ ինչպես շատ հայ ընտանիքներ, ընդ որում՝ նաև իմ պապերիս ընտանիքները, հարազատների մի մասի դիակները թողնելով գաղթի ճանապարհին և մազապուրծ լինելով թուրքական յաթաղանից՝ հանգրվանեցին ներկայիս Հայաստանի Հանրապետություն կոչվող փոքրիկ հողակտորի վրա՝ աչքները չկտրելով Արարատ լեռան և նրանից այն կողմ թողած իրենց ծննդավայրերին։

Ցեղասպանությունից փրկված մարդիկ կորցրեցին իրենց հարազատների մեծ մասին, գյուղերում՝ իրենց տները, այգիները, անասունները։ Քաղաքներում արհեստանոցները, խանութները, ֆաբրիկաներն ու բանկերը, որոնք ստեղծվել էին քրտինքով հարյուրամյակների ընթացքում։

Ովքե՞ր տիրացան նրանց սեփականությանը: Դրա՞ համար պետք է շնորհակալ լինենք: