Ինչպե՞ս մերժեցիք, ձեր հետ միասին առաջնագիծ մեկնելու, Արցախի նախագահի խնդրանքը. Էս չե՞ք. բաց նամակ ԱԱԾ-ին

Վերջին շրջանում հանրության ուշադրությունից չեն վրիպել ձեր ստորաբաժանման կողմից իրականացվող գործողությունները։ Մասնավորապես՝ Մայր Աթոռ Սուրբ Էջմիածնի Վեհարանում և Արագածոտնի թեմի առաջնորդարանում իրականացված հատուկ գործողությունները, ինչպես նաև փաստաբան Ալեքսանդր Կոչուբաևի նկատմամբ անհամաչափ ֆիզիկական ուժի կիրառումը, որի ընթացքում նրան պառկեցրել են ասֆալտին, մտահոգություն են հարուցել հասարակության շրջանում։

 

Այդ գործողությունները առաջ են բերում բազմաթիվ հարցեր՝ կապված միջոցների անհրաժեշտության, համաչափության և օրինականության հետ։

 

Նկատելով, որ այդ հատուկ գործողությունները իրականացվել են ՀՀ քաղաքացիների նկատմամբ, ցանկանում ենք ձեր ստորաբաժանման ծառայողներին ուղղել հետևյալ հռետորական հարց՝ ինչպե՞ս մերժեցիք ԱՀ նախկին նախագահ Արայիկ Հարությունյանի խնդրանքը, ըստ որի նա ցանկություն էր հայտնել ձեր հետ միասին առաջնագիծ մեկնելու։ Ի՞նչ պատասխան տվեցիք երկրի նախագահին։

 

Հաշվի առնելով առկա տեղեկությունները ձեր պատասխանների վերաբերյալ, հորդորում ենք պահպանել մասնագիտական արժանապատվությունը, հարգել մարդու իրավունքներն ու հասարակության վստահությունը և խուսափել գործողություններից, որոնք կարող են վարկաբեկել ծառայության հեղինակությունը։

 

Հ.Գ. Էս չե՞ք։

 

ՀՀ պահեստազորի զինծառայողների նախաձեռնություն։