Սպիտակի քաղաքապետի թեկնածու Վանիկ Ասատրյանի հարցերով դիմել Գայանեին

Լոռու մարզի Սպիտակի քաղաքապետի թեկնածու, նախկին քաղաքապետ և այժմյան փոխմարզպետ Վանիկ Ասատրյանը թեև արդեն փաստացի նախընտրական քարոզարշավ է սկսել, սակայն դեռևս խուսափում է պատասխանել լրագրողների հարցերին:

Newspress.am-ի հավաստի տեղեկություններով` Վանիկ Ասատրյանը «Թագուհի» ռեստորան է հրավիրել տարածաշրջանի համայնքների գյուղապետերին և մտերմիկ զրույց ունեցել նրանց հետ: Գործող փախմարզպետը մասնավորապես խոստացել է գյուղապետերին վեր հանել նրանց համայնքի խնդիրներն ու շուտափույթ լուծում տալ դրանց:

Նկատենք, որ այս հանդիպմանը եկել է ընդհամենը 4 գյուղապետ: Իսկ Վանիկ Ասատրյանն էլ այս պահին դադարեցրել է փոխմարզպետի լիազորությունները՝ քարոզարշավ իրականացնելու համար:

Թե որքանով են հավաստի այս տեղեկությունները newspress.am-ը փորձեց պարզել հենց Վանիկ Ասատրյանից: Սակայն վերջինս, հարցը դեռ մինչև վերջ չլսած, պատասխանեց, թե ոչ մի հարցի չի պատասխանելու:

«Ապրիլի 4-6-ը ասուլիս եմ տալու Երևանում. բոլոր լրատվամիջոցներին կհրավիրենք և բոլոր հարցերին կպատասխանեմ»,- ասաց նախկին քաղաքապետը:

Հարցին, թե որ մամուլի ակումբում կլինի ասուլիսը նա ասաց. «Չգիտեմ, էդ հարցերով Գայանեն ա զբաղվում, ինքը կասի»:

Թե ով է Գայանեն և ինչպես կարելի է նրա հետ կապվել ասուլիսի օրը, ժամն ու վայրը պարզելու համար՝ մնաց անհայտ:

Վանիկ Ասատրյանը հրաժարվեց նաև այս պահին գնահատական տալ գործող քաղաքապետ Գագիկ Սահակյանի աշխատանքին:

«Կգաք ասուլիսին, էդ հարցը կտաք՝ կպատասխանեմ»,-եզրափակեց նախկին քաղաքապետը: