Արմինե Տիգրանյանը ԵԱՀԿ հարթակում ադրբեջանական պատվիրակության ներկայությամբ բարձրաձայնել է Ադրբեջանի կողմից հայատյացnւթյան դրսևորումների, բռնnւթյnւնների մասին

Վարշավայում ընթանում է միջազգային համաժողով՝ նվիրված ԵԱՀԿ մասնակից երկրներում մարդու իրավունքների և հիմնարար ազատությունների խնդիրներին։

Հոկտեմբերի 14-ին ռասայական խտրականության դեմ պայքարի և հանդուրժողականությանը նվիրված նիստին պատմական գիտությունների թեկնածու, մշակույթի իրավունքի փորձագետ Արմինե Տիգրանյանը հանդես է եկել զեկուցմամբ՝ ներկայացնելով Արցախից Ադրբեջանի պատերազմական հանցանքների հետևանքով բռնի տեղահանված շուրջ 150 հազար հայ ժողովրդի իրավունքների հրատապ պաշտպանության, Ադրբեջանի կողմից ռասայական ատելության հիմքով հայկական պատմական հուշարձանների ոչնչացման, հայ ժողովրդի համայնքային կյանքի կազմաքանդման և ինքնությանը հասցված ծանր վնասների մասին։

Տիգրանյանը նշել է, որ ի հեճուկս ստեղծած հումանիտար խորը ճգնաժամի, հարկ է ուշադրություն դարձնել Արցախի ժողովրդի մշակույթի իրավունքի խախտումներին, որոնք ամրագրված են Մարդու իրավունքների համընդհանուր հռչակագրում և ՄԱԿ֊ի համապատասխան դաշնագրերում։

Ա. Տիգրանյանը ադրբեջանական ընդգրկուն պատվիրակության ներկայությամբ և միջազգային բարձր հարթակից բարձրաձայնել է Ադրբեջանի կողմից շարունակվող հայատյացության դրսևորումների, բռնությունների, Արցախի հայկական լանդշաֆտի իսլամացման խնդիրների մասին և նշել, որ Հաագայի Արդարադատության միջազգային դատարանի կողմից արդեն իսկ դատապարտված մարդկության դեմ այս ծանր հանցագործությունները պետք է արժանանան միջազգային համապատասխան գնահատականի և կանխվեն, պետք է ապահովվի արցախահայության անվտանգ վերադարձի իրավունքի իրացումը դեպի իրենց պատմական հայրենիք։

ԵԱՀԿ մասնակից երկրներում մարդու իրավունքների հարցերով միջազգային համաժողովն անցկացվում է  հոկտեմբերի 14-17-ը։ 

Մասնակիցները քննարկում են ԵԱՀԿ տարածաշրջանում առկա զարգացումները և դրանց հետևանքները, ինչպես նաև Հելսինկիի սկզբունքների պարտավորությունների շարունակական կարևորությունը տարածաշրջանի ընդհանուր անվտանգության համար: Համաժողովը հարթակ կառաջարկի ԵԱՀԿ 57 մասնակից պետությունների կողմից պարտավորությունների կատարման գնահատման համար և կապահովի տեսակետների փոխանակման, լավագույն փորձի փոխանակման և միջազգային հանրության ուշադրությանը հարցեր բարձրացնելու համար: