Գանձեր ջան, ե՞րբ պետք է մեկնարկեին դաբաղի դեմ վակցինացիայի աշխատանքները և ե՞րբ են մեկնարկել. Պիպոյան

«Իրազեկ և պաշտպանված սպառող» ՀԿ նախագահ Բաբկեն Պիպոյանը ֆեյսբուքյան գրառմամբ արձագանքել է էկոնոմիկայի նախարարի պաշտոնը զբաղեցնող Գևորգ Պապոյանի՝ կենդանիների շրջանում դաբաղ հիվանդության վերաբերյալ հնչեցրած հայտարարություններին.

«Էկոնոմիկայի նախարարը հայտարարեց, որ անհանգստանալու կարիք չկա, զուտ հարևան երկրներում հիվանդություն կա, դրա համար էլ իրենք պատվաստում են անում ու շատ լավ են իրենց գործը անում:

Քանի որ գործի լավ կամ վատ անելու գնահատականը խիստ կախված է վերահսկող կառույցի կատարած աշխատանքով՝ ի դեմս սննդամթերքի անվտանգության տեսչական մարմնի, ու վերահսկողության արդյունքում արձանագրված կամ չարձանագրված խնդիրներով, մի քանի հարց էլ ՍԱՏՄ-ին տամ:

Գանձեր ջան, ե՞րբ պետք է մեկնարկեին վակցիանացիայի աշխատանքները և ե՞րբ են մեկնարկել, եթե եղել է ուշացում, ո՞րն է եղել պատճառը և ինչ քայլեր էիք ձեռնարկել, որպեսզի աշխատանքները ժամանակին մեկնարկեին:

Էկոնոմիկայի նախարարն ասում է, որ հարևան երկրներում դաբաղ կա, նայում եմ, Թուրքիան Կենդանիների առողջության համաշխարհային կազմակերպությանւ ծանուցել է, որ իսկապես ունի: Ի՞նչ քայլեր եք ձեռնարկել' սահմանակելու ներմուծումը, և եթե չեք իրականցրել, ինչո՞ւ:

Սահմանամերձ հատվածներում ուժեղացրե՞լ եք հսկողությունը, որ «միամիտ հիվանդացած» կենանիներին չթաքցնեն և չտեղափոխեն՝ տարածելով հիվանդությունը:

Շուկաների աշխատանքը սահմանափակել ե՞ք, որ «միամիտ» հիվանդ կենդանին չհայտնվի շուկայում ու «միամիտ» չտարածի հնարավոր հիվանդությունը: Եթե այո, ե՞րբվանից և ո՞ր հրամանով: Հսկե՞լ եք, թե ինչպես են անասնաբույժներն իրականացնում պատվաստումները, օրինակ, լինու՞մ են դեպքեր, երբ մտնում են կասկածելի տնտեսություն և հետո, դուրս գալով' առանց կարանտին պահելու, շարունակել են աշխատանքը՝ մտնելով այլ տնտեսություններ կամ, ասենք, դժվարություն են ունեցել ու, ասենք, աշխատանքի գնալու փոխարեն քնել են:

Ո՞նց եք ֆոտոներ հրապարակում «հացի արտադրամասը նախկինում և հիմա», անասնաբույժների նկատմամբ հսկողություն իրականացրել ե՞ք, որ մի ֆոտո էլ հրապարակեք ու ասենք թե ասեք՝ «անասնաբույժը նախկինում և հիմա»՝ մեկը բազմոցին քնած, մեկը փոքր սառնարանով վակցինա տեղափոխելով ու աշխատանք կատարելով:

Գանձեր ջան, հրապարակեք, որ իմանանք' մեր անուշ ախպերը ճիշտ էր ասում, երբ ասում էր' մենք լավ ենք աշխատում:

Եթե չեք ուզում հրապարակեք, կարող եք հիշել «Կարգին հաղորդումը» և ուրախ-զվարթ բարձրաձայնել. «լավ չենք աշխատում, լավ չենք աշխատում»»։