Մեծ Բրիտանիան լիովին վերացնում է Հայաստանի և Ադրբեջանի նկատմամբ զենքի էմբարգոն

Մեծ Բրիտանիայի խորհրդարանի կայքում հրապարակվել է Եվրոպայի և Հյուսիսային Ամերիկայի հարցերով պետական ​​նախարար Սթիվեն Դաութիի գրավոր հայտարարությունը Ադրբեջանի և Հայաստանի նկատմամբ զենքի էմբարգոյի վերացման վերաբերյալ։

Հայտարարության մեջ ասվում է. Այս հայտարարությունը փոխարինում է 2025 թվականի հուլիսի 1-ի նախարարական գրավոր հայտարարությանը «Զենքի էմբարգոյի (Ադրբեջան և Հայաստան)» վերաբերյալ: Ես ձեզ տեղեկացնում եմ Հարավային Կովկասում տեղի ունեցող նշանակալի զարգացումների և Մեծ Բրիտանիայի արձագանքի մասին Հայաստանի և Ադրբեջանի միջև խաղաղության գործընթացում պատմական առաջընթացին: Օգոստոսի 8-ին Վաշինգտոնում տեղի ունեցավ եռակողմ խաղաղության գագաթնաժողով, որը նախագահում էր նախագահ Թրամփը և մասնակցում էին Ադրբեջանի նախագահ Ալիևը և Հայաստանի վարչապետ Փաշինյանը: Գագաթնաժողովն ավարտվեց նախնական խաղաղության համաձայնագրի և համատեղ հռչակագրի ստորագրմամբ, որը ներառում էր ԵԱՀԿ Մինսկի խմբի լուծարման կոչ և պարտավորություն՝ ապահովելու անարգել տեղաշարժը Ադրբեջանի և Նախիջևանի միջև՝ հարգելով Հայաստանի ինքնիշխանությունն ու տարածքային ամբողջականությունը: Մեծ Բրիտանիան ողջունում է այս առաջընթացը, որը կարևոր քայլ է տարածաշրջանում երկարաժամկետ խաղաղության և կայունության ուղղությամբ: Խաղաղության ուղղությամբ հետագա առաջընթացին աջակցելու համար Մեծ Բրիտանիան բարձրացրել է իր երկկողմ հարաբերությունները Հայաստանի և Ադրբեջանի հետ՝ հասցնելով ռազմավարական գործընկերության: Սա պաշտոնականացնում է առևտրի, անվտանգության և պաշտպանության ոլորտներում համագործակցությունը և նախատեսում է տարեկան նախարարական հանդիպումներ՝ առաջընթացը գնահատելու համար: Օգոստոսի 24-26-ը ես այցելեցի երկու երկրներ՝ վերահաստատելու Մեծ Բրիտանիայի աջակցությունը և քննարկելու Հարավային Կովկասում երկարաժամկետ խաղաղության ամրապնդման գործնական միջոցառումները։ Մեծ Բրիտանիան աջակցել է ԵԱՀԿ Մինսկի խմբի փակմանը, ինչպես խնդրել էին երկրները, և ողջունում է սեպտեմբերի 1-ին այն լուծարելու վերաբերյալ ձեռք բերված կոնսենսուսը։  Հետևաբար, Մեծ Բրիտանիան լիովին վերացնում է Հայաստանի և Ադրբեջանի նկատմամբ զենքի էմբարգոն։ Այս որոշումը հնարավորություն կտա զարգացնել անվտանգության և պաշտպանության գործընկերությունները և աջակցել երկու երկրների ինքնիշխանությանը և տարածքային ամբողջականությանը, ներառյալ ավանդական և հիբրիդային սպառնալիքների դեմ պայքարը։ Արտահանման դիմումները և առևտրային լիցենզիաները կշարունակեն գնահատվել անհատապես՝ համաձայն Մեծ Բրիտանիայի ռազմավարական արտահանման լիցենզավորման չափանիշների. լիցենզիաները չեն տրամադրվի, եթե դրանք հակասեն այդ չափանիշներին։ Տարածաշրջանում իրավիճակը մշտապես կվերանայվի։ Մեծ Բրիտանիան հույս ունի, որ սա կլինի Հարավային Կովկասում խաղաղության, անվտանգության և բարգավաճման հնարավորության պահ, և պատրաստ է համագործակցել երկու երկրների՝ ԱՄՆ-ի, ԵՄ-ի և այլ երկրների հետ,-նշված է հայտարարությունում: