Անուշ ախպեր, եղունգից հոտ քաշելով որ հարևան պետության անունը տալիս ես, հեչ մտածու՞մ ես, որ նույնը իրենք կարող են անել. Պիպոյանը՝ Պապոյանին

«Իրազեկ և պաշտպանված սպառող» ՀԿ նախագահ Բաբկեն Պիպոյանը, արձագանքելով երեկ ԱԺ-ում էկոնոմիկայի նախարարի պաշտոնը զբաղեցնող Գևորգ Պապոյանի՝ Հայաստանում դաբաղի դեպքերի վերաբերյալ հայտարարությանը, գրում է.

«Էկոնոմիկայի նախարարը հայտարարում է, որ Վրաստանում դաբաղ կա: Հետն էլ շարունակում, որ քանի որ դաբաղ է, մենք էլ պատվաստում ենք ու շատ լավ է վիճակը:

Մեկը չկա ասի. իմ անուշ ախպեր, խի՞, որ Վրաստանում դաբաղ չլիներ, պատվաստում չէիք անելու՞: Կամ, որ ավելի հետաքրքիր է, պատվաստումները երբ պետք է սկսեիք ու երբ եք սկսել: Ավելի լավ հարցեր էլ կարելի է տալ, օրինակ, թե ինչի՞ց է վերցրել, որ Վրաստանում դաբաղ կա, վրացիք Կենդանիների առողջության համաշխարհային կազմակերպությանն այդ մասին զեկուցե՞լ է, մենք, որպես պետություն, որևէ սահմանափակում դրե՞լ ենք:

Անուշ ախպեր, եղունգից հոտ քաշելով, զուտ հավեսի ընկած, որ հարևան պետության անունը տալիս ես, հեչ մտածու՞մ ես, որ նույնը իրենք կարող են անել:

Մնաց մի հարց, որն արդեն չգիտեմ, թե ում է ուղղված. ո՞նց անենք, որ հասկանան՝ խոսելուց առաջ մտածելը, եթե անգամ ու պարտադիր չէ՝ ցանկալի է»։