Հերն էլ անիծած, թե Նուբարաշենը հրդեհի ու գարշահոտի մեջ է. նախանձելի անհոգություն՝ վառվող աղբանոցի ֆոնին

Էրեբունի վարչական շրջանի ֆեյսբուքյան էջում տեղադրվել են լուսանկարներ՝ կապված Երևան քաղաքի օրվա հետ:

Կատարվել է նաև գրառում, որտեղ նշված է, որ Էրեբունու շրջանից  մեկնարկել է «Բացահայտիր Հայաստանը երկնքից» օդագնացության միջազգային փառատոնը։

Շատ հետաքրքիր է, թե միջացառման մասնակիցներն ինչ են բացահայտել երկնքից՝ որքան տարա՞ծք է ընդգրկել Նուբարաշենի հրդեհվող աղբանոցը, թե՞ մինչև ուր է հասնում գարշահոտ ծուխը:

Լուսանկարներում Քաղաքապետարանի ներկայացուցիչներն ու վարչական շրջանի ղեկավար կազմն այնքան անհոգ ու երջանիկ են, որ կարծես չեն նկատում հետնաֆոնին հրդեհից բարձրացող ծխի քուլան:

Երևի մեջքով են կանգնել, որ աչքի առաջ չլինի:

Հարկ է նշել նաև, որ ֆեյսբուքյան էջում կատարված գրառման մեջ նշված է.

«Տոնի մեկնարկը վերածվել էր իսկական գունեղ միջոցառման՝ լի երգով, պարով և դրական էներգիայով»։

Այ այստեղ արդեն ոչ մի կասկած. միջոցառման գունեղությունն ապահովել է բազմերանգ վառվող թափոններից առաջացած ծուխը, իսկ երգն ու պարը և դրական էներգետիկ հորմոնները, հավանաբար, ապահովվել  են այրվող տարատեսակ խոտաբույսերի ու այլ հակամարմինների օդի հետ խառնված բույրը:

Մի խոսքով՝ նախանձելի անհոգություն. ու հերն էլ անիծած, թե Նուբարաշենը հրդեհի ու գարշահոտի մեջ է:

Արմինե Մկրտումյան