Դատախազությունն ուսումնասիրում է մեր հրապարակումը. Վահե Ղազարյա՞նն է «Դիլիջան» ազգային պարկում ծառահատումներ ու շինարարություն անում և կա՞ շինթույլտվություն

«Դիլիջան» ազգային պարկում իրականացվում են ծառահատումներ և շինարարություն։ NEWSPRESS.am-ը տեսանյութ էր հրապարակել նշված վայրից։ Մեզ հայտնի էր դարձել նաև, որ ազգային պարկում ակտիվ շինարարություն է ծավալում ՆԳ նախկին նախարար Վահե Ղազարյանը. կապիտալ շինարարություն` ծառահատումներով։

Դատախազությանը դիմել էինք հետևյալ հարցադրումներով, թե՝

1․ Արդյոք իրականացնողը Վահե Ղազարյա՞նն է, թե՞ շինարարությունը մեկ այլ անձի անունից է իրականացվում (եթե այո՛, ապա՝ ում)։

2․ Արդյոք ԳԴ-ն ստուգումներ իրականացրե՞լ է տվյալ տարածքում պարզելու համար, թե ինչ շինարարություն է իրականացվում և կա՞ արդյոք շինթույլտվություն (ում կողմից է այն տրված)։

3․ Ծառահատումներ իրականացնելու համար կա՞ արդյոք թույլտվություն (ո՞ւմ կողմից է այն տրված)։

Այս հարցադրումներին դատախազությունից եկել է լակոնիկ պատասխան․ պարզվում է՝ Գլխավոր դատախազությունում նշված բովանդակությամբ վարույթի առկայության մասին տվյալներ չկան։

Ամեն դեպքում, դատախազությունից նշել են, որ հրապարակման մեջ նշված տեղեկության վերաբերյալ ուսումնասիրություններ են իրականացվում: