Հայաստանի շահերը չեն կարող պաշտպանվել խոսքերով, երբ դիմացինը պատրաստվում է գործողություններով. «Քոչարի» կուսակցություն

ՔՈՉԱՐԻ ԱԶԳԱՅԻՆ ՎԵՐԱԾՆՈՒՆԴ ԵՎ ԱԶԳԻ ԶԱՐԹՈՆՔ ԿՈՒՍԱԿՑՈՒԹՅԱՆ ԴԻՐՔՈՐՈՇՈՒՄԸ

Գաբալայի գագաթնաժողովի քաղաքական վտանգավորության մասին

Գաբալա քաղաքում անցկացված Թուրքական պետությունների կազմակերպության գագաթնաժողովը ևս մեկ անգամ բացահայտեց այն իրական քաղաքական օրակարգը, որը հակասում է ոչ միայն Հայաստանի, այլև ողջ տարածաշրջանի անվտանգության և կայունության շահերին։

Ադրբեջանի նախագահ Իլհամ Ալիևի և Ուզբեկստանի նախագահ Շավքաթ Միրզիյևի հայտարարությունները՝ ըստ որոնց Զանգեզուրի միջանցքը ներկայացվում է որպես «թուրքական աշխարհի հաղթանակ», փաստացի նշանակում են Հայաստանի ինքնիշխան տարածքի նկատմամբ տարածքային հավակնության բաց և ագրեսիվ դրսևորում։

Սա ոչ միայն ուղղված է Հայաստանի դեմ, այլև վտանգ է ներկայացնում Ռուսաստանի և Չինաստանի աշխարհաքաղաքական շահերի համար, քանի որ այդ միջանցքի բացումն իր էությամբ փորձում է ստեղծել անընդհատ թուրքական աշխարհ–ՆԱՏՕ-ական ազդեցության գիծ՝ Կասպից ծովից մինչև Միջերկրական։

Հունգարիայի վարչապետ Վիկտոր Օրբանի մասնակցությունը այս ձևաչափին նույնպես մտահոգիչ է։ Նրա ներկայությունը չի բխում ոչ Եվրոպայի, ոչ տարածաշրջանի խաղաղության շահերից, այլ ընդհակառակը՝ լեգիտիմացնում է քաղաքական նախաձեռնություն, որը նպաստում է լարվածության, մրցակցային բևեռացման և հնարավոր ռազմական էսկալացիայի խորացմանը։
Եվրոպան, որը փորձում է հանդես գալ որպես խաղաղության ջատագով, չպետք է աջակցի այն հարթակներին, որտեղ տարածքային նկրտումները ներկայացվում են որպես «քաղաքակրթական հաղթանակ»։

Այս ֆոնի վրա Հայաստանի իշխանությունների՝ Նիկոլ Փաշինյանի գլխավորած իշխանության կեղծ խաղաղության օրակարգը ավելի քան բացահայտ է։ Երբ ամբողջ տարածաշրջանը պատրաստվում է նոր բախումների, իսկ թուրք-ադրբեջանական բլոկը ձևակերպում է բաց ռազմավարական պահանջներ Հայաստանի տարածքի նկատմամբ, Փաշինյանի վարչակարգը շարունակում է խոսել խաղաղության մասին՝ առանց որևէ անվտանգության երաշխիքի և ազգային շահի պաշտպանության։
Նման օրակարգը ոչ թե խաղաղություն է, այլ հանձնում՝ քաղաքական կոռեկտության քողի տակ։

Հայաստանի շահերը չեն կարող պաշտպանվել խոսքերով, երբ դիմացինը պատրաստվում է գործողություններով։
Քոչարի Ազգային Վերածնունդ և Ազգի Զարթոնք կուսակցությունը զգուշացնում է՝ Գաբալայի գագաթնաժողովը ոչ թե տնտեսական կամ մշակութային հարթակ է, այլ գեոպոլիտիկական ճնշման գործիք, որի նպատակը Հարավային Կովկասում նոր սահմանագծեր գծելն է՝ Հայաստանի հաշվին։

Մենք կոչ ենք անում Հայաստանի իշխանություններին դադարեցնել ժողովրդին խաբելու քաղաքականությունը և վերադառնալ ազգային ու պետական մտածողությանը, քանի դեռ ուշ չէ։

ՔՈՉԱՐԻ ԱԶԳԱՅԻՆ ՎԵՐԱԾՆՈՒՆԴ ԵՎ ԱԶԳԻ ԶԱՐԹՈՆՔ ԿՈՒՍԱԿՑՈՒԹՅԱՆ ՎԱՐՉՈՒԹՅՈՒՆ