Պենտագոնն այս շաբաթ ընկերություն կընտրի՝ ԱՄՆ ռազմածովային ուժերի համար անտեսանելի կործանիչ մշակելու համար․ Reuters

Մի քանի ամիս տևած ձգձգումներից հետո, Պենտագոնն արդեն այս շաբաթ կընտրի պաշտպանական ընկերություն, որը կմշակի և կկառուցի ռազմածովային նավատորմի հաջորդ ստելս-կործանիչը, հայտնում է Reuters-ը։

Ըստ ամերիկացի պաշտոնյայի և որոշմանը ծանոթ երկու անձի, դա կլինի բազմամիլիարդանոց նախագիծ, «որը կենտրոնական դեր կունենա Չինաստանին հակազդելու ԱՄՆ-ի ջանքերում»։

Boeing և Northrop Grumman ընկերությունները մրցում են F/A-XX անվանումով ինքնաթիռի արտադրության իրավունքի համար։ Նոր տախտակամածային ռեակտիվ ինքնաթիռը կփոխարինի F/A-18E/F Super Hornet ռազմածովային նավատորմի ինքնաթիռներին, որոնք շահագործման մեջ են 1990-ականներից։ Ընտրությունը շարունակելու մասին որոշումն ուրբաթ օրը կայացրել է ռազմական նախարար Փիթ Հեգսեթը, հայտնել են ամերիկացի պաշտոնյան և աղբյուրներից մեկը։ ԱՄՆ ռազմածովային ուժերը կարող են հայտարարել իրենց կործանիչի մրցույթի հաղթողին արդեն այս շաբաթ, հայտնել է աղբյուրներից մեկը։

Սակայն, ըստ աղբյուրների, անցյալում ռազմածովային ուժերի ռեակտիվ ինքնաթիռի հետ կապված վերջին րոպեի խնդիրների պատճառով առաջընթացը հետաձգվել է և դա կարող է նորից տեղի ունենալ։

Գարնանը և ամռանը Պենտագոնի և Կոնգրեսի միջև ֆինանսավորման շուրջ ծագած վեճը հետաձգել էր ծրագրի առաջընթացը։ Պենտագոնը 74 միլիոն դոլար էր պահանջել՝ ռեակտիվ ինքնաթիռի ստեղծման համար՝ «զարգացման նվազագույն ֆինանսավորումը» պահպանելու նպատակով։ Մայիսին Reuters-ը հայտնել էր, որ Պենտագոնի որոշ պաշտոնյաներ փորձել են հետաձգել ծրագրի իրականացումը մինչև երեք տարով՝ վկայակոչելով տեխնիկական հնարավորությունների և մատակարարման շղթայի վերաբերյալ մտահոգությունները։ Կոնգրեսը և ռազմածովային նավատորմը ցանկացել են արագացնել պայմանագրի ստորագրումը։ Կոնգրեսը 750 միլիարդ դոլար էր հատկացրել՝ F/A-XX ռեակտիվ ինքնաթիռի մշակումն արագացնելու համար՝ զանգվածային հարկային և ծախսային օրինագծի շրջանակներում, որը ստորագրվել էր այս ամառ։ Բացի այդ, 2026 ֆինանսական տարում Կոնգրեսը 1,4 միլիարդ դոլարի լրացուցիչ հատկացում էր կատարել F/A-XX-ի համար։