Վրացական հասարակությունն այլևս կուրորեն չի վստահում Բրյուսելին, Կրեմլին կամ Վաշինգտոնին

Վրացական հասարակությունն այլևս կուրորեն չի վստահում Բրյուսելին, Կրեմլին կամ Վաշինգտոնին: Այս մասին հայտարարել է Վրաստանի վարչապետ Իրակլի Կոբախիձեն։ Նա նշել է, որ վրացական հասարակությունն այլևս չի հավատում օտարերկրյա դիվանագիտական ​​ներկայացուցիչների կամ միջազգային կազմակերպությունների հայտարարություններին։

«Հասարակությունն այլևս կուրորեն չի հետևում ԱՄՆ-ի և ԵՄ դեսպաններին: Սա մեր ամենամեծ նվաճումներից մեկն է: Մարդկանց այլևս չի հետաքրքրում՝ ԵՄ-ն է, Բրյուսելը, Կրեմլը, թե Վաշինգտոնը. ճշմարտությունն է նրանց համար ամենակարևորը», - ասել է կառավարության ղեկավարը «Ռուսթավի 2»-ին տված հարցազրույցում։

Կոբախիձեի խոսքով՝ նախորդ տարիներին Վրաստանում հեղափոխական գործընթացները հիմնականում վերահսկվում էին քաղաքական կուսակցությունների և օտարերկրյա հետախուզական գործակալությունների կողմից, սակայն հետագայում այս դերը ստանձնեցին լրատվամիջոցները և ոչ կառավարական կազմակերպությունները։ Վրաստանի վարչապետը նշել է, որ այսօր Վրաստանում հասարակական գիտակցությունը փոխվել է, և ոչ մի օտարերկրյա գործակալ չի կարող այնպես ազդել հասարակական կարծիքի վրա, ինչպես նախկինում. «Եթե ԵՄ ներկայացուցիչը կամ ԱՄՆ դեսպանը աջակցում է երկրի համար անպատշաճ արժեքների, հասարակությունը տեսնում է դա և չի ընդունում: 2023-2024 թվականներին նրանց որոշ կեղծ հայտարարություններ առաջացրել են հանրային զայրույթ: Այսօր իրավիճակը այլ է. հասարակությունն արդեն մտածում, վերլուծում և որոշում է ճշմարտությունը իր համար: Սա Վրաստանի ամենամեծ նվաճումներից մեկն է»,- նշել է նա: