Պահանջում ենք անհապաղ վերանայել և չեղարկել այս դատավճիռը. «Քոչարի» կուսակցության հայտարարությունը

«Քոչարի» ազգային վերածնունդ և ազգի զարթոնք կուսակցությունն իր դիրքորոշումն է հայտնել Շիրակի թեմի առաջնորդ Միքայել արքեպիսկոպոս Աջապահյանի նկատմամբ տեղի ունեցածը:

Կուսակցության վարչություն կողմից տարածված հայտարարության մեջ մասնավորապես ասվում է.

«Քոչարի ազգային վերածնունդ և ազգի զարթոնք կուսակցությունը խստորեն դատապարտում է Միքայել արքեպիսկոպոսի դատապարտումը։ Մենք համարում ենք այն ոչ միայն անթույլատրելի, այլև վտանգավոր նախադեպ՝ ուղղված Հայ Առաքելական Եկեղեցու հոգևորականների և ընդհանրապես այլակարծիքների լռեցմանը։ Այս դատավճիռը որևէ կապ չունի արդարադատության հետ․ այն քաղաքական հաշվեհարդարի գործիք է, որի նպատակը երկիրն այլախոհությունից մաքրելն է ու հասարակության մեջ սարսափի մթնոլորտ ձևավորելը։ Այլակարծիքի քրեականացումը սարսափելի հարված է ժողովրդավարությանը, խոսքի ազատությանը և ազգային միասնականությանը։

Այն ժամանակ, երբ երկիրը խեղդվում է հանցագործությունների մեջ, և անպատժելիությունը դարձել է ամենուր տարածված երևույթ, իշխանությունները զբաղված են միայն այլակարծիքներին պատժելով։ Սա հստակ ցույց է տալիս, որ իշխանության նպատակն արդարություն հաստատելը չէ, այլ իշխանությունը պահելը՝ վախի և ճնշման միջոցով։ Մեր կուսակցությունը հայտարարում է, որ Հոգևոր առաջնորդին ազատազրկելը՝ նրա արտահայտած քաղաքական դիրքորոշման համար, նշանակում է հարված հասցնել նաև հավատքի և եկեղեցու ազատությանը։

Սա իշխանությունների կողմից ինստիտուցիոնալ բռնաճնշում է, որը թիրախավորում է ցանկացած այլակարծիք անձի՝ անկախ դիրքից կամ հանրային ազդեցությունից։

Մենք պահանջում ենք անհապաղ վերանայել և չեղարկել այս դատավճիռը, որովհետև այն ոչ թե արդարադատություն է, այլ քաղաքական հաշվեհարդար։ Ամենայն հայոց պատմության ընթացքում, երբ հայերն ավելի քան հազար տարի պետականություն չունեին, մեզ պահել է Հայ Առաքելական Եկեղեցին՝ որպես ազգային ինքնության և մշակույթի պահապան։

Պաշտպանական հիմնավորումը Միքայել արքեպիսկոպոսի հայտարարությունների

Միքայել արքեպիսկոպոսի հայտարարությունները իշխանափոխության վերաբերյալ պետք է դիտարկվեն ոչ թե որպես ապօրինի կոչեր, այլ որպես ազգային վտանգի պայմաններում բարձրացված ազգային-քաղաքական ահազանգ։ Երբ հայրենիքը կանգնած է իրական սպառնալիքի առաջ, իսկ գործող իշխանությունները գործում են հակաազգային ուժերի շահերին ծառայելով, յուրաքանչյուր գիտակից հայի պարտքն է բարձրաձայնել, որ այդպիսի իշխանությունը չունի ժողովրդի վստահության մանդատ։ Հոգևորականը, որպես ժողովրդի բարոյական առաջնորդ, իրավունք և պարտավորություն ունի հնչեցնել այդ կոչը։

Նրա խոսքը բխում է հայրենասիրությունից, ազգային արժանապատվությունից և ժողովրդի ապագայի հանդեպ պատասխանատվությունից։ Ուստի՝ Միքայել արքեպիսկոպոսի հայտարարությունները ոչ միայն արդարացված են, այլև ազգային անվտանգության ու պետական ինքնիշխանության պահպանման տեսանկյունից պարտադիր ահազանգ»: