Կառավարությունը 245 մլն դրամ հատկացրեց՝ Ռադիոիզոտոպների արտադրության կենտրոնին

Կառավարությունն այսօր հաստատեց Հայաստանի Հանրապետության առողջապահության նախարարությանը գումար հատկացնելու, Հայաստանի Հանրապետության կառավարության 2015 թվականի դեկտեմբերի 24-ի N 1555-Ն որոշման մեջ լրացումներ կատարելու մասին որոշումը: Նախագծով առաջարկվում է «Ռադիոիզոտոպների արտադրության կենտրոն» փակ բաժնետիրական ընկերության կանոնադրական կապիտալն ավելացնել:

Հիմնական զեկուցող ՀՀ առողջապահության նախարար Արմեն Մուրադյանն իր խոսքում նշեց, որ նախագծով առաջարկում են կառավարության պահուստային ֆոնդից 244 մլն 983 հզ դրամ գումար հատկացնել Կենտրոնին պահպանման ծախսերը հոգալու, ինչպես նաև՝ համապատասխան սարքավորումներ ձեռք բերելու և տարածքը բարեկարգելու նպատակով:

«Հիշատակված գումարի շուրջ 207մլն դրամը հատկացնել ընթացիկ աշխատանքները և համապատասխան ապրանքներն ու սարքավորումները ձեռք բերելու նպատակով, իսկ մնացածը տրամադրել ընկերությանը՝ կենտրոնը պահպանելու նպատակով»,- ասաց նա:

Նախարարը նաև երկու օր ժամանակ խնդրեց նախագծում խմբագրական շտկումներ կատարելու համար, որը ևս բավարարվեց:

«Խնդիրը քննարկվել է նախագահի աշխատակազմի ղեկավարի և ֆինանանսերի նախարարության հետ»,- ասաց նախարարը:

Վարչապետ Հովիկ Աբրահամյանն էլ իր հերթին հավելեց, որ նախագիծը պետք է արդեն քննարկված լիներ: «Սա չի՞ քննարկվել, բա՞ երեք նիստ առաջ էիք ուզում քննարկել այս հարցը, ինչի՞ մասին է խոսքը»,- հարցրեց վարչապետը, որին ի պատասխան նախարար Արմեն Մուրադյանը հստակեցրեց, որ խնդիրը քննարկվել է համապատասխան նախարարության կազմկոմիտեում և եղել են համապատասխան առաջարկներ, որոնք ներկայացվել են երեկոյան ուշ և չեն հասցրել դրանք ներառել; «Առաջարկվել է նախագահի աշխատակազմի կողմից որոշակի խմբագրական աշխատանքներ կատարել»,- ասաց նախարարը:

Վարչապետ Հովիկ Աբրահամյանը հետաքրքրվեց, թե պահանջվող գումարը հատկացնելու դեպքում Կենտրոնը լիարժեք գործելո՞ւ է, որին ի պատասխան նախարարը դրական արձագանքեց:

Վարչապետը նշեց, որ այդ շտկումները մատակարարելու համար երկու օր ժամանակ է տրամադրում: