Իսրայելը Գազայի մոտ առևանգել է Գազա օգնություն հասցնող նավատորմի վերջին նավը

Իսրայելն առևանգել է Գազա մեկնող նավատորմի վերջին նավը, որը դեռևս շարժվում էր դեպի Գազայի հատված:

Այս մասին հայտնել են նավատորմի պաշտոնյաները։

«Resilience Flotilla նավատորմի վերջին նավը, կալանվել է Գազայից մոտավորապես 42.5 ծովային մղոն (մոտավորապես 78 կիլոմետր) հեռավորության վրա», - ասվում է նավատորմի Telegram ալիքում հրապարակված հայտարարության մեջ։

Հաղորդվում է, որ Իսրայելի ռազմածովային ուժերն առևանգել են նավատորմի բոլոր նավերը մոտավորապես 38 ժամվա ընթացքում։ Սակայն նավատորմի ներկայացուցիչները հայտարարել են, որ սա վերջը չէ և որ նրանք մտադիր են շարունակել իրենց պայքարը պաղեստինցիներին աջակցելու համար։

Նախորդ օրը Իսրայելի պաշտպանության ուժերը հաստատել են 41 նավերի առգրավումը և մոտ 400 ակտիվիստների ձերբակալությունը:

Ոստիկանության տվյալներով՝ ավելի քան 250 ակտիվիստներ ստուգվել և հանձնվել են Բնակչության և ներգաղթի վարչությանը։