Բաքուն որոշել է Լևոն Մնացականյանից «խոշտանգող» սարքել

Բաքվի դատարանում շարունակվում է Արցախի ռազմաքաղաքական ղեկավարության դեմ շինծու մեղադրանքներով դատական նիստը։ Այսօրվա նիստում, ինչպես հայտնում են ադրբեջանական լրատվամիջոցները, «վկաներից մեկը» ցուցմունք է տվել Լևոն Մնացականյանի դեմ։ Այսօրվա նիստում ևս Բաքուն շարունակել է որդեգրած գիծը՝  հայերին վերագրել այն բոլոր ռազմական հանցագործությունները, որ բնորոշ են հենց Ադրբեջանին. հայերին այսօր որպես «խոշտանգող են» ներկայացրել։

Ըստ ադրբեջանական քարոզչամեքենայի՝ Իլհամ Մամեդով անունով վկան ցուցմունք է տվել, որ 2002 թվականի մայիսի 10-ին զինծառայության ժամանակ մարտական դիրքեր գնալիս ինքը գերեվարվել է հայկական զինուժի կողմից Հարամա դաշտում։

Պայմանագրով ստանձնած պարտավարություններից հրաժարված ու հայ գերիներին չվերադարձնող Բաքվի դատարանում «վկան» ասել է, թե իբրևե «գերության ընթացքում իրեն ծեծել, խոշտանգել են և, որ այդ սպայի անունը եղել է Լևոն»։

Ըստ ադրբեջանական լրատվամիջոցների՝ նշված անձը դատարանում մատնացույց է արել ՊԲ նախկին հրամանատար Լևոն Մնացականյանին ու ասել, թե հենց Մնացականյանն է եղել իրեն խոշտանգողը։ Ըստ «վկայի»՝ հայկական կողմում զինվորականները, իբրև, իրեն ստիպել են քայլել ականապատ դաշտով։

Նա նաև նշել է, որ գերի ընկնելուց առաջ չի ճանաչել Լևոն Մնացականյանին և չգիտեր նրա պաշտոնը այդ ժամանակ։

Լևոն Մնացականյանի հարցերին ի պատասխան՝ ադրբեջանցի «վկան» նշել է, որ ծնվել է 1973 թվականին և գերի ընկնելու պահին ունեցել է ավագ լեյտենանտի կոչում։