էլեկտրոնային գրանցման կիրառումը վերացնելու է բոլոր խնդիրները

«Ընտրությունների ժամանակ ընտրողների գրանցման էլեկտրոնային եղանակի կիրառումը վերացնելու է բոլոր այն խնդիրները, ինչի մասին բարձրաձայնում են ընդդիմադիր քաղաքական ուժերը և քաղաքացիական հասարակության ներկայացուցիչները»,- «Անդրադարձ» մամուլի ակումբում լրագրողների հետ զրույցում ասաց ԱԺ ՀՀԿ խմբակցության պատգամավոր Գագիկ Մինասյանը:

Գագիկ Մինասյանը կարևորում է նաև այն հանգամանքը, որ էլեկտրոնային գրանցման մեթոդին անցնելու պարագայում պետք է ելնել այն կոնցեպցիայից, որ գրանցման գործընթացը լինելու է միայն նույնականացման քարտերով, քանի որ միայն այդպես հնարավոր կլինի լուծում տալ առկա խնդիրներին:

«Մոտավորապես 2.5 միլիոն ընտրողի պարագայում շուրջ 600 հազարն արդեն այսօր ունի այդպիսի քարտեր: Եվ եթե մենք գալիս ենք համաձայնության քաղաքացիական հասարակության, քաղաքական դաշտի ներկայացուցիչների հետ, որ իսկապես դա մեր խնդիրների լուծման իսկական ճանապարհն է, ապա պետք է իրականացվեն կազմակերպչական եւ ֆինանսական բնույթի մի շարք խնդիրներ, որովհետեւ այն տեխնոլոգիան, որ մենք այսօր իրականացնում ենք մեր քաղաքացիներին նույնականացման քարտերի տրամադրմամբ, բնականաբար, չի կարող ապահովել 1 տարվա ընթացքում 2 միլիոն քաղաքացիների համար այդպիսի քարտերի տրամադրում»,-մանրամասնեց նա:

Ըստ նրա, եթե ֆինանսկան միջոցները հայթհայթվեն, ապա հնարավոր կլինի իրագործել:

Մինասյանի խոսքով՝ իրենց նպատակը հանրության շրջանում վսատահության բարձացումն է ընտրական պրոցեսների նկատմամբ:

Անդրադառնալով 4+4+4 ֆորմատով բանակցություններին` Գագիկ Մինասյանը նշեց, որ կարծում է, թե ճիշտ կլինի ընդդիմադիրները առաջինը ձևակերպեն խնդիրները, հետո միայն առաջարկություններ ներկայացնեն: Ինչ վերաբերում է բանակցությունների արդյունավետությանը, ապա դա ժամանակը ցույց կտա: