Ծառուկյանի «Ավիա-Սերվիս»-ի գործով ցմահ դատապարտյալը մահացել է

Նուբարաշենի քրեակատարողական հիմնարկում պատիժը կրող, ցմահ դատապարտված 35 ամյա Հենրիկ Հովնիկյանը մարտի 31-ի գիշերը ժամը 4.00-ին մահացել է Սուրբ Գրիգոր Լուսավորիչ հիվանդանոցում: Ըստ newspress.am-ի տեղեկությունների` հիվանդանոցում Հենրիկ Հովնիկյանը հրաժարվել է միջամտությունից և չի թողել որևէ օգնություն ցուցաբերեն:

Դատապարյալը Եհովայի վկա էր և ժամանակին դատապարտվել էր Գագիկ Ծառուկյանին պատկանող «Ավիա-Սերվիս»-ի տնօրենի հետ կապված գործով: Դեռ 2009թ-ի ցմահ դատապարտյալը նամակով դիմել էր ՀՀ նախագահին որով փորձել էր ուշադրություն հրավիրել այդ գործի վրա: Ըստ դատապարտյալի եղել է շինծու մեղադրանք. «Մեծարգո նախագահ, գտնվում եմ ծայրահեղ իրավիճակում եւ միայն Դուք կարող եք անդրադառնալ այս չարաբաստիկ գործին, ինչը որոշիչ կլինի ինձ համար, քանի որ տուժող կողմը «Ավիա-Սերվիսի» տնօրենն է: Իսկ այդ կառույցի սեփականատիրոջը Դուք քաջ ծանոթ եք»:

Հ. Հովնիկյանը հայտնում է, որ, իր հավաստի տեղեկություններով, վերոհիշյալ անձը ասել է, թե չի խառնվում աշխատակցի խնդիրներին, այսինքն՝ ոչ մի ճնշում չի գործադրում դատական գործընթացներին: Սակայն մտահոգված է, քանի որ հանգուցյալ Ա. Խալաթյանի ազգականները զբաղեցնում են բարձր պաշտոններ ԱԱԾ-ում, դատախազությունում եւ ձեռնարկությունների սեփականատերեր են: Ըստ Հ. Հովնիկյանի, նրանք դատարանի վրա ճնշում են գործադրել, ինչի արդյունքում դատավորները, վախից դրդված չարաշահելով իրենց պաշտոնը, անհիմն պատժաչափ (ցմահ ազատազրկում) են սահմանել իր համար:

«Ձեր ուշադրությունն եմ ուզում հրավիրել դատավոր Կարինե Ղազարյանի հայտարարությանը. չփորձեք ճնշումներ բանեցնել դատարանի վրա՝ հասարակական օբյեկտներում նստելով ու զանգեր կատարելով ու դատարանի փոխարեն որոշելով, թե մեղադրյալի համար ինչպիսի պատժաչափ սահմանել: Եթե տիկին Ղազարյանը որոշել էր բոլորիս ցմահ դատապարտել, ապա ի՞նչ իմաստ ուներ բոլորիս ներկայությամբ նման հայտարարություն անել»,- գրում է դատապարտյալը:

Հ. Հովնիկյանը հայտնում է, որ դատարանը հաշվի չառավ իրեղեն ապացույցները: Նա համոզված է, որ եթե հաշվի առնվեր` կփոխվեր իր կարգավիճակը. «Ինձ մեղադրում էին փաստաթղթերի կեղծման, առեւանգման եւ շահադիտական դրդումներով սպանության մեջ: Ամբողջ քրգործը կազմված է մի անձի կեղծ ցուցմունքների վրա եւ դատարանը ստիպված էր փաստաթղթերի կեղծման մասով ինձ արդարացնել: Դատարանը չկարողացավ ապացուցել այն, ինչում ինձ մեղադրում էին՝ իբր փակել եմ Ա. Խալաթյանի բերանը եւ երկու ձեռքով խեղդել նրան՝ պոլիէթիլենային պարկը գլխին եւ մետաղաճոպանը պարանոցին փաթաթած: Սա միանշանակ սուտ է, քանի որ մատնադրոշմային փորձագետները վերը նշված առարկաների վրա իմ մատնահետքերը չեն հայտնաբերել եւ չէին էլ կարող հայտնաբերել, քանի որ նման արարք չեմ կատարել»:

Հիշեցնենք, որ Հովնիկյանը ցմահ դատապարտյալի կարգավիճակում պատիժը կրում էր արդեն ութ տարի: