Ի՞նչն է ձեզ անհանգստացրել, որ հերոսաբար պայքար եք մղում Հայոց ցեղասպանության ուրացումը քրեականացնող նախագծի դեմ․ Քրիստինե Վարդանյանը՝ ՔՊ-ին (տեսանյութ)

«Ես չեմ հասկանում, ժողովուրդ, խնդիրը ո՞րն է: Ազգային ժողովում «Հայաստան» խմբակցության կողմից ներկայացված Հայաստանի Հանրապետության քրեական օրենսգրքում փոփոխություն կատարելու մասին նախագծի քննարկմանն ասաց «Հայաստան» խմբակցության պատգամավոր Քրիստինե Վարդանյանը։

«Բերել ենք Հայոց ցեղասպանության ուրացումը քրեականացնող հոդվածը։ Ի՞նչն է ձեզ անհանգստացրել, որ հերոսաբար պայքար եք մղում այս նախագծի դեմ»,- ասաց նա։

Քրիստինե Վարդանյանը հարցադրում արեց՝ ընդհանրապես հայ մարդն այս օրենքի հետ ի՞նչ խնդիր կարող է ունենալ։ «Խնդիր կարող է ունենալ այն մարդը, այն թիմը, ում ղեկավարը, օրինակ, երբ Իսրայելի վարչապետ Նեթանյահուն ուղիղ եթերով ճանաչում է Հայոց ցեղասպանությունը, ինքն հաջորդ օրն ասում է՝ բայց մենք պետք է հասկանանք, թե Ցեղասպանության ճանաչումն ինչ խնդիր է մեզ համար լուծում։ Լավ է՝ չեք դատապարտել Նեթանյահուին Ցեղասպանությունը ճանաչելու համար, նոտա չեք հղել դեսպանատուն՝ խիստ դատապարտելով։ Դուք ոչ թե ուրացել, նսեմացրել եք, պղծել եք ամեն ինչ»,- ասաց Քրիստինե Վարդանյանը՝ դիմելով ՔՊ խմբակցության պատգամավորներին։