Մեծ Բրիտանիան, Իտալիան և Ֆրանսիան աջակցում են Թրամփի Գազայի հարցով ծրագրին

Աշխարհի մի շարք առաջնորդներ և արտաքին գործերի նախարարներ հայտարարել են ԱՄՆ նախագահ Դոնալդ Թրամփի՝ Գազայի հատվածի համար խաղաղության ծրագրին իրենց աջակցության մասին և պատրաստ են համագործակցել Գազայում ռազմական գործողությունները դադարեցնելու համար։

«Մենք կոչ ենք անում բոլոր կողմերին միավորվել և համագործակցել ԱՄՆ վարչակազմի հետ՝ այս առաջարկը վերջնականապես մշակելու և իրականացնելու համար», - ասել է Մեծ Բրիտանիայի վարչապետ Քիր Սթարմերը։ Նա կարծում է, որ պաղեստինյան ՀԱՄԱՍ շարժումը պետք է ընդունի ԱՄՆ ծրագիրը, վայր դնի զենքերը և ազատ արձակի մնացած պատանդներին։ Նա նշել է, որ Մեծ Բրիտանիան պատրաստ է համագործակցել իր գործընկերների հետ՝ ապահովելու կայուն խաղաղություն, որտեղ պաղեստինցիներն ու իսրայելցիները կարող են ապրել կողք կողքի՝ անվտանգության մեջ:

Իտալիայի վարչապետ Ջորջիա Մելոնին նույնպես ողջունել է ԱՄՆ առաջարկը՝ նշելով, որ այն կարող է լինել շրջադարձային կետ, որը թույլ կտա ռազմական գործողությունների մշտական ​​դադարեցում, բոլոր պատանդների անհապաղ ազատ արձակում և քաղաքացիական անձանց համար լիարժեք և անվտանգ մարդասիրական հասանելիություն:

Միևնույն ժամանակ, Ֆրանսիայի նախագահ Էմանուել Մակրոնը X սոցիալական մեդիա հարթակում հայտարարել է, որ ակնկալում է վճռական գործողություններ Իսրայելից:

«Համասը չունի այլընտրանք, քան անհապաղ ազատ արձակել բոլոր պատանդներին և հետևել այս ծրագրին», - ասել է նա։