Նարեկ Սարգսյանը Երևանին վերջին հարվածն է հասցնում

«Ալեքսանդր Թամանյանի թանգարան-ինստիտուտ» և «Ճարտարապետության ազգային թանգարան-ինստիտուտ» պետական ոչ առևտրային կազմակերպությունները միավորվելու են և կոչվելու են «Ճարտարապետության ազգային թանգարան-ինստիտուտ» պետական ոչ առևտրային կազմակերպություն:

Նշենք, որ Երևանը իր խորհրդային տեսքի համար պարտական է հենց Ալեքսանդր Թամանյանին, ով մոխիներից կառուցեց, դիմագիծ ու ձեռագիր տվեց փոքրիկ Հայաստանի մայրաքաղաքին:

Անկախության շրջանում, մասնավորապես Նարեկ Սարգսյանի ձեռամբ Ալեքսանդր Թամանյանի ձևավորած և երազած Երևանն աղճատվեց այն աստիճան, որ անգամ օտարերկարցիներն էին ծաղրում, թե ուզում եք վազելով ԵՄ մտնել, Փարիզը Նյու Յորք եք սարքում, որտեղ է ձեր երեք հազարամյա Երևանը և այլն:

Այժմ էլ երևի Նարեկ Սարգսյանին հանգիստ չի տալիս Թամանյանի կերպարը:

Միաձուլման անհրաժեշտության մեջ նշվում է, որ Ալեքսանդր Թամանյանի թանգարան-ինստիտուտի և Ճարտարապետության ազգային թանգարան-ինստիտուտ պետական ոչ առևտրային կազմակերպությունների հիմնական խնդիրներն ու նպատակները նույնն են և արդյունավետ կառավարման համար նպատակահարմար է վերակազմակերպել կազմակերպությունները միացման ձևով: Այսինքն հինգ հոգու կառավարման համար է այս ամբողջ թանգարանա-կառավարական աղմուկը և նման աբսուրդ իրավիճակ կարող է միայն Հայաստանում հանդիպել, որտեղ ամեն քայլի կարող են ոչնչացնել ազգային մեծությունների հետքերը:

Այսինքն այստեղ խնդիրը դրված չէ առանձին պահպանել Երևանի գլխավոր նախագծի հեղինակին և նրա ժառանգությունը, այլ պետք է տնտեսական խնդիրները կարգավորել:

Եվ եթե Նարեկ Սարգսյանը իրոք լավ ճարտարապետ լիներ, նա հետևողական կլիներ, որ Ալեքսնադր Թամանյանի նման անհատի օջախը կանգնուն մնար, ոչ թե երկու կառույցներ միաձուլել այնպես, որ Ալեքսնադր Թամանյանի անունը անգամ վերանա թանգարանների ցանկից:

Նշենք, որ ճիշտ չէ քաղաքաշինության նախարարության այն հիմնավորումը, որ երկու կազմակերպությունները նույն նպատակներն ունեն, Թամանայանի անվան թանգարան-ինստիտուտ զբաղվում է Թամանյանի իրերի, նախագծերի, էսքիզների և ընդհանրապես ճարտարապետի ժառանգության պահպանությամբ, ուսումնասիրությամբ, իսկ Ճարտարապետության ազգային թանգարան-ինստիտուտը զբաղվում է ճարտարապետությամբ առհասարակ, այնպես, որ քաղաքաշինության նախարարությունն առնվազն ստում է:

Նաև նշվում է, որ որոշման նախագծի ընդունման կապակցությամբ պետական բյուջեում ծախսերի և եկամուտների փոփոխություններ չեն առաջանում: Այսինքն կառավարությանն այս որոշումը պետք չէր, անգամ եկամուտների և ծախսերի փոփոխություններ չի նախատեսվում, ուրեմն ինչու էր պետք երկու կառույցների միավորումը: Պարզապես Նարեկ Սարգսյանի քմահաճություն: Նախ Ալեքսանդր Թամանյանի անունը դուրս եկավ կառույցի անվանումից, հետո բավարարվեց Նարեկ Սարգսյանի միակ լինելու մարմաջը, նա ոչ միայն ոչնչացրեց Թամանյանի երևանյան կառույցները, այլ ոչնչացրեց այն միակ անկյունը, որտեղ Թամանյանը դեռևս ապրում էր իր գծագրերում, կառույցներում և ժողովրդի հիշողության մեջ և միայն դրական երանգներով, իսկ ոմանց դրական ճարտարապետի կերպարն այլևս գոյություն չունի: