Քանի որ Փաշինյանը դեռևս ղեկավարում է, ուրեմն ընդդիմությունը թույլ է. Մամիկոն Ասլանյան

Իմպիչմենտի օրակարգը քաղաքական այն գործիքակազմ է, որից պարտադիր պետք է օգտվել՝ անկախ դրա արդյունքներից, անկախ ով, ինչքանով, ինչ չափով է ներգրավված»,- Ազգային ժողովի դիմաց նախքան ԱԺ նիստերի դահլիճում «Պատիվ ունեմ» խմբակցության հրավիրած  «Ազգային ճգնաժամի և կառավարման ձախողման մասին» ԱԺ հայտարարության  նախագծի քննարկումը՝ լրագրողներին ասաց Վանաձորի նախկին քաղաքապետ Մամիկոն Ասլանյանը։

Ինչ վերաբերում է  հարցին, թե ինչո՞ւ ընդդիմության 7 տարի է չի հաջողվում հեռացնել Նիկոլ Փաշինյանին՝ Փաշինյա՞նն է ուժեղ, թե՞ ընդդիմությունն է թույլ, նա ասաց. «Երկուսն էլ ճիշտ են, քանի  որ Նիկոլ Փաշինյանը  դեռևս ղեկավարում է, ուրեմն ընդդիմությունը թույլ է, չի կարողանում Փաշինյանին փոխել։

Իսկ ընդդիմություն ասածը բազմաշերտ երևույթ է։  Հետևաբար, այստեղ  խնդիրը տարբերակումների մեջ է»,- ասաց Մամիկոն Ասլանյանը։

Նա նշեց, որ ընդդիմությունն իրավունք ունի քաղաքական երևույթների, իրավական տարբեր գործընթացների նկատմամբ ունենալ տարաբնույթ կարծիքներ. «Այստեղ խնդիրն արդեն քաղաքական երկխոսության, քաղաքական երկխոսության արդյունքում ընդհանուր հայտարարի գալու մասին է»։

Դիտարկմանը՝ եթե կարևորը Նիկոլ Փաշինյանի հեռացումն է, պետք է շահերը դրվեին մի կողմ, Մամիկոն Ասլանյանն ասաց. «Անկախ քաղաքական նախասիրություններից, ուղղվածություններից, եթե ընդհանուր պայքարի տրամաբանությունն իշխանությունը փոխելն է, կառավարության ղեկավարին փոխելն է, ձեր ասածն այդ տրամաբանության մեջ է։ Թե ինչու չեն կարողանում, ինչն է խանգարում, օգնում, դժվար է ասել»։