Արդեն 31-րդ անգամ բացվեց «Թատերական Լոռի» միջազգային փառատոնի վարագույրը (լուսանկարներ)

Սեպտեմբերի 26-ին հանդիսավոր պայմաններում 31-րդ անգամ բացվեց «Թատերական Լոռի» միջազգային փառատոնի վարագույրը, որը նվիրված էր ՀՀ ժողովրդական արտիստ Վոլոդյա Գրիգորյանին։

 

Բացման հանդիսույթին հրապարակվեց Ալավերդու համայնքապետ Դավիթ Ղումաշյանի ուղերձը։ Այնուհետև ելույթներ ունեցան, ալավերդցիներին և փառատոնի մասնակից թատերախմբերին ողջունեցին ՀԹԳՄ նախագահ Հակոբ Ղազանչյանը, Երևանի Հովհ․ Թումանյանի անվան պետական տիկնիկային թատրոնի գեղարվեստական ղեկավար Ռուբեն Բաբայանը, երգահան, թատերական գործիչ Քրիստ Մանարյանը, Իրանի Համադան քաղաքի միջազգային փառատոնի նախագահ Ազադեհ Անսարին, Դաղստանի պետական ռուսական տիկնիկային թատրոնի տնօրեն Ամինատ Յախյաևան, Կինոյի և թատերավեստի ինստիտուտի Վանաձորի մասնաճյուղի տնօրեն Էլֆիք Զոհրաբյանը, ովքեր բարձր գնահատեցին Հայաստանի հանրապետության ամենահնագույն թատերատոնի արդեն կեսդարյա գոյությունը և նշանակությունը տարածաշրջանում հոգևոր արժեքների քարոզչության և բնակչության մշակութային պահանջմունքների բավարարման գործում։ Շնորհակալական խոսք ասացին Վոլոդյա Գրիգորյանի դուստրը նաև փառատոնի տնօրեն Հրաչյա Պապինյանը։

 

«Թատերական Լոռին» մեր երկրի ամենահնագույն փառատոնն է, հիմնադրվել է 1976 թ․ Ակներ գյուղում, այնուհետև շարունակել է գործել Ալավերդի քաղաքում։ Փառատոնի ակունքներում կանգնած են նաև ԽՍՀՄ ժողովրդական արտիստ Հրաչյա Ղափլանյանը, ՀՀ ժողովրդական արտիստ Երվանդ Ղազանչյանը։ Փառատոնը վերջին տարիներին այն անց էր կացվում Լոռու մարզի բոլոր քաղաքներում համաժամանակյա, սակայն այս տարի անց է կացվում միայն Վանաձոր և Ալավերդի քաղաքներում։

 

Այս տարի «Թատերական Լոռիին» մասնակցության հայտ են ներկայացրել 15 թատրոն մայրաքաղաքից, Գյումրիից, Վանաձորից, Դաղստանից, Իրանից, Մոսկվայից։ Փառատոնը կավարտվի հոկտեմբերի 6-ին։ Ընդհանուր առմամբ Ալավերդի և Վանաձոր քաղաքներում կխաղացվի տասնինը ներկայացում։ Փառատոնը բացվեց Համազգային թատրոնի «Ջին խաղը՞ ներկայացմամբ՝ Արման Նավասարդյանի բեմադրությամբ։ Վաստակավոր արտիստներ Գրետա Մեջլումյանը, Դավիթ Հակոբյանը, նաև բեմադրիչ Արման Նավասրադյանը համապատասխանաբար ստացան՝ ԽՍՀՄ ժողովրդական արտիստներ՝ Արուս Ասրյանի, Խորեն Աբրահամյանի և Սոս Սարգսյանի անվան մրցանակներ։