Առաքել Մովսիսյանը, Սամվել Ալեքսանյանն ու Մհեր Սեդրակյանը չեն դասավանդի ՀՀԿ դպրոցում

ՀՀԿ փոխնախագահ Արմեն Աշոտյանը այսօր լրագրողների հետ հանդիպմանը ներկայացրեց կուսակցության երկու նոր որոշումներ, որոնցից առաջինը վերաբերում է ՀՀԿ կառուցվածքում արտաքին կապերի նոր հանձնաժողով ստեղծելուն, մյուսը՝ կուսակցության նոր ծրագրի նախագծի մշակմանը: Արմեն Աշոտյանը նշեց, որ ՀՀԿ-ն նախապատրաստվում է աշնանը կայանալիք համագումարին և դրան ընդառաջ սկսում է կուսակցության նոր ծրագրի նախագծի մշակումը, ինչի համար ստեղծվել է աշխատանքային խումբ. «Կուսակցական ծրագրի վերանայումը հույժ կարևոր է, եթե խոսում ենք քաղաքական կուսակցությունների կայացման նոր մակարդակի մասին: ՀՀԿ ծրագիրը վերանայվել ու հաստատվել է 10 տարի առաջ, այս ընթացքում քաղաքական ու քաղաքագիտական մտքի զարգացումներ են տեղի ունեցել և ստեղծվել են նոր հնարավորություններ ու մարտահրավերներ։ Կուսակցության ծրագիրը պետք է ոչ միայն համապատասխանի ներկային, այլ նաև ուրվագծի ապագան: Համագումարին ժամանակից ծրագրի տեսլականը կներկայացնենք հանրությանը»,- ասաց նա:

Արմեն Աշոտյանը նաև նշեց, որ ծրագրի նախագիծը քննարկվելու է մարզային ու տարածքային կենտրոնների հետ:

Նա նաև անդարադարձավ ՀՀԿ-ի քաղաքական դպրոցին՝ ասելով, որ Առաքել Մովսիսյանը, Սամվել Ալեքսանյանն ու Մհեր Սեդրակյանը չեն դասավանդի այդ դպրոցում:

«Չեմ զարմանում արձագանքների վրա, որովհետև փաստացի ՀՀԿ-ն առաջինն է, որ նման որոշում է կայացրել։ Դպրոցի ստեղծման նպատակն է ունենալ շարունակական ու լրացուցիչ կրթական ծրագրերի միջոցով բարելավել կուսակցության անդամների և համակիրների կազմակերպչական, քաղաքական և ինտելեկտուալ կարողությունները: Դռները բաց են լինելու նաև անկուսակցական մարդկանց համար:

Դպրոցի նպատակն է լինելու նաև՝ նպաստել քաղաքական ու քաղաքագիտական մտքի զարգացմանը Հայաստանում, այն ինչի անհրաժեշտությունը զգացվում է»,-ասաց նա: