Անկախության տոնի առիթով պետության բարձրագույն ղեկավարի ելույթը հնչում է Ֆեստիվառի շրջանակում․ վերլուծաբան

Վերլուծաբան Հակոբ Բադալյանը նկատում է՝ անկախության տոնի առիթով պետության բարձրագույն ղեկավարի ելույթը հնչում է Ֆեստիվառի շրջանակում:

«Սա իհարկե ունի նախընտրական տրամաբանություն, որի մեջ է Նիկոլ Փաշինյանը: Այսինքն, կազմակերպվում է ոչ թե դահլիճային միջոցառում, որտեղ լինում են հիմնականում հրավիրյալներ այսպես ասած վերնախավային շերտերից, այլ ժողովրդական լսարանի առաջ:

Սակայն, մյուս կողմից սա իհարկե նաեւ հենց այն կենցաղայնության վկայությունն է, որի մասին ես խոսում եմ, գնահատելով պետականության ինստիտուտի մատուցումը հանրությանը: Երբ Անկախության տոնի առիթով կազմակերպվում է պետական հանդիսավոր միջոցառում, դա ամենեւին «վերնախավային քմահաճույքից» չէ, այլ պետականության մշակույթի առանձնահատկությունից: Պետականության ու կենցաղի սերտաճումից կենցաղն ու իշխանությունը շահողի դիրքում է, պետությունն ու պետականությունը՝ կորցնողի:

Պետականության մշակույթը, ընկալումն ու մտածողությունը ենթադրում են որոշակի ճարտարապետություն, որը թույլ է տալիս պետականության կրող հանրություններին ձեւակերպել վերկենցաղային ընդհանուր նպատակներ եւ մշակել դրանց սպասարկման կանոններ՝ կարճաժամկետ, միջնաժամկետ ու երկարաժամկետ: Երբ դա չկա, հանրությունը կորցնում է կենցաղից վեր որեւէ այլ նպատակի մոտիվն ու ձգտումը: Իսկ դա նշանակում է, որ պետականությունը դադարում է գոյություն ունենալ դե ֆակտո, մնալով միայն դե յուրե՝ որպես ցուցանակ, որ կախված է «ցանկապատի» վրա»,-գրել է վերլուծաբանը։