ՔՊ-ի համար աշխատող` Ամասիայի Էլցանցի պետի առանձնատան արժեքը գերազանցում է 2 միլիոն դոլարը (տեսանյութ)

ՔՊ-ական Սարիկ Մինասյանի` Հայաստանի էլեկտրական ցանցերի Շիրակի մարզային կառույցի տնօրեն նշանակվելուց հետո ուշագրավ զարգացումներ են տեղի ունեցել մարզում: Ինչպես և սպասվում էր, սկսվել է ՀԷՑ-ի ղեկավար կազմին «հավաքագրելու» գործընթացը գալիք տարի կայանալիք խորհրդարանական ընտրություններին ընդառաջ: 

NEWSPRESS.am-ի տեղեկություններով` Սարիկ Մինասյանը հավաքել է ՀԷՑ-ի Շիրակի մարզի ներկայացուցիչներին և ուլտիմատում դրել` ով կաշխատի ՔՊ-ի համար, խնդրեմ, թող մնա և աշխատի, ով չի աշխատի` թող դիմում գրի, հեռանա: 

Եվ ահա, Ամասիայի Էլցանցի պետ Յուրիկ Հարությունյանն առաջին համաձայնողներից է եղել: 

Հարությունյանին ճանաչող մեր աղբյուրները պատմեցին, որ նա երկար տարիներ աշխատել է ՀԷՑ-ում, երբևէ բիզնեսով չի զբաղվել, որպեսզի կարողանար կուտակել այն ամենն, ինչ ունի: Փոխարենը մեզ ասացին, որ Հարությունյանը, եթե ցանկանար էլ, չէր կարողանա մերժել ՔՊ-ի առաջարկ-պարտադրանքը, քանի որ մշտապես խարդախություններ է թույլ տվել` ընդհուպ մարդկանցից գույքեր է խլել: Կարճ ասած` խիստ խոցելի անցյալով մարդուն ավելի հեշտ է ինչ-որ բաներ պարտադրելը: Հարությունյանին, սակայն, որևէ բան պարտադրելու կարիք էլ չի եղել, որովհետև վերջինս հոգով-սրտով ՔՊ-ական է: 

Ասում են, որ 2021-ի ընտրություններին, երբ ՀԷՑ այնժամանակվա ղեկավարությունն աշխատել է երկրորդ նախագահ Ռոբերտ Քոչարյանի օգտին, Հարությունյանը միակն է եղել, որ աշխատել է ՔՊ-ի համար: 

Դե, ասենք, ՔՊ-ին պետք է շնորհակալ լիներ Հարությունյանը, չէ՞ որ որդին` զինվորական Դանիել Հարությունյանը կարողացել է «հրաշքով», եթե ավելի առարկայական ասենք` կեղծ թղթաբանությամբ, ազատվել պատերազմին մասնակցելու պարտականությունից, ապա պատերազմի ավարտից հետո դիմում է գրել ու դուրս եկել բանակից: Բայց դրանից հետո, ՔՊ-ականների գործուն ջանքերով, պատերազմից խուսափած երիտասարդը վերադարձել է ծառայության. զինկոմիսարիատում զորակոչային բաժնի ավագ սպա է` մայորի կոչումով: 

Մեր աղբյուրների պնդմամբ` որդին` Դանիելն էլ փողեր քերելու հարցում չի զիջում հորը. զորակոչիկներից կաշառք է վերցնում` նրա բանկային քարտին տերմինալից անհասկանալի փոխանցումներ են լինում: Չենք պնդում, թե մեր աղբյուրի հայտնածը 100 տոկոսանոց ճշմարտություն է, բայց ճշմարտանման է այնքանով, որ Հարությունյան ավագին պատկանող, տեսանյութում ներկայացվող առանձնատան շուկայական արժեքը 2 միլիոն դոլարը գերազանցում է: 

Ո՞վ կարող է Հայաստանում ցամաք աշխատավարձով 2 միլիոն դոլարանոց տուն ունենալ, մոտ կես միլիոն դոլարի կարողություն` Ամասիայում, անշարժ գույք Երևանում և ոչ միայն: Թերևս միայն նրանք, ովքեր համագործակցում են տվյալ ժամանակվա իշխանությունների հետ և ունեն իշխանությունների բարձր հովանավորչությունը: Հակառակ պարագայում` իրավապահները վաղուց գնացած կլինեին Հարությունյան ընտանիքի հետևից:

Տեսանյութում ներկայացված բոլոր կոմերցիոն տարածքներն ու առանձնատունը, ըստ մեր աղբյուրի, ամբողջությամբ պատկանում է Յուրիկ Հարությունյանին: