Զաքիր Հասանովն ու Թուրքիայի զինված ուժերի գլխավոր շտաբի պետ Բաքվում քննարկել են տարածաշրջանային անվտանգության հարցեր

Ադրբեջանի պաշտպանության նախարար, գեներալ-գնդապետ Զաքիր Հասանովն ընդունել է Թուրքիայի զինված ուժերի գլխավոր շտաբի պետ Սելջուկ Բայրաքթարօղլուին և նրա գլխավորած պատվիրակությանը։

Պատվիրակության այցը կազմակերպվել է պաշտպանության նախարարի առաջին տեղակալ` Ադրբեջանի գլխավոր շտաբի պետ Քերիմ Վելիևի հրավերով։

Զաքիր Հասանովը գոհունակություն է հայտնել պատվիրակության Ադրբեջան այցի կապակցությամբ։ Նա նշել է, որ Ադրբեջանի և Թուրքիայի միջև խորը պատմական արմատների, ընդհանուր արժեքների և փոխադարձ վստահության վրա հիմնված հարաբերությունները շարունակում են զարգանալ պետությունների ղեկավարների միջև բարեկամական հարաբերությունների շնորհիվ։

Պաշտպանության նախարարը շնորհավորել է գեներալ Բայրաքթարօղլուին գլխավոր շտաբի պետի պաշտոնում նշանակվելու կապակցությամբ։

Բայրաքթարօղլուն շնորհակալություն է հայտնել ջերմ ընդունելության և հյուրընկալության համար։ Նա ընդգծել է, որ նման այցելություններն ու հանդիպումները դրականորեն են նպաստում փոխադարձ վստահության և բարեկամության վրա հիմնված հարաբերությունների զարգացմանը։

Այցի ընթացքում տեղի է ունեցել նաև երկու երկրների գլխավոր շտաբների պետերի միջև առանձին հանդիպում։

Կողմերը քննարկել են ռազմական, ռազմատեխնիկական, ռազմակրթական և այլ ոլորտներում համագործակցության ներկա վիճակը և հեռանկարները, ինչպես նաև մտքեր են փոխանակել տարածաշրջանային անվտանգության հարցերի և փոխադարձ հետաքրքրություն ներկայացնող թեմաների շուրջ։