Իսկ վստա՞հ եք, որ Կարեն Ավանեսյանին հենց իրենք չեն «կարգել» իբրեւ «ահաբեկության փորձ» անող. վերլուծաբան

Վերլուծաբան Հակոբ Բադալյանը գրել է.

Պատահեցի հայաստանյան մեկնաբանություններ նախօրեին Ադրբեջանի տարածած տեղեկատվության առնչությամբ, ըստ որի, օկուպացված Ստեփանակերտում մնացած հայերից Կարեն Ավանեսյանն իբրեւ թե փորձել է իրականացնել ահաբեկություն եւ կիրառել է անտառում թաքցրած զենք ու նռնակներ: Ադրբեջանական տեղեկատվության համաձայն, նա նռնակներ է նետել, ոստիկանները պատասխան կրակ են բացել եւ վիրավորել ու ձերբակալել նրան:

Կրկնեմ, սա ադրբեջանական տեղեկատվությունն է, որը բավականին հարցեր է առաջացնում եւ ունի մեղմ ասած արժանահավատության խնդիր:

Հայաստանում արդեն պատահեցի մեկնաբանություններ, թե Ավանեսյանը «մեր օրերի Թեհլերյանն» է: 

Արցախի կորստից հետո մարդկային արձագանքների զգացմունքային ասպեկտները իհարկե շատ տարբեր են, բայց կարծում եմ բոլորովին պետք չէ շտապել Ավանեսյանին կնքել «մեր օրերի Թեհլերյան»: Նախ, մեծ հարց է, թե արդյո՞ք դրանով որեւէ կերպ օգտակար կլինեք հենց նրան: Եվ երկրորդ, նույնպիսի հարց է թերեւս, թե արդյո՞ք դրանով օգտակար չեք լինի Ադրբեջանին: Ի վերջո մեզանից որեւէ մեկը չգիտե, թե ադրբեջանական ինֆորմացիայի ո՞ր մասն է իրական, իսկ որը՝ մտացածին տեղեկատվություն, որը կարող է ունենալ դրա վրա հետագա մի քանի տեղեկատվա-դիվանագիտական քայլ կառուցելու նպատակ, հաշվարկ:

Իսկ վստա՞հ եք, որ Կարեն Ավանեսյանին հենց իրենք չեն «կարգել» իբրեւ «ահաբեկության փորձ» անող: 

Համենայն դեպս, կարծում եմ պետք չէ շտապել գնահատականների հարցում, որոնք, կրկնեմ՝ որեւէ կերպ օգտակար չեն լինելու հենց Ավանեսյանին, բայց շատ օգտակար կարող են լինել ադրբեջանական հաշվարկների համար: