7-8 ամիս անց մեր քաղաքական թիմը բացարձակ մեծամասնությամբ նորից իշխանության է գալու. ՔՊ-ական

Ես ավելի քան վստահ եմ, որ ընդամենը 7-8 ամիս անց մեր քաղաքական թիմը բացարձակ մեծամասնությամբ նորից իշխանության է գալու։ Այս մասին, այսօր՝ սեպտեմբերի 12–ին, ԱԺ–ում լրագրողների հետ զրույցում նշեց ՔՊ–ական պատգամավոր Էմմա Պալյանը։

«Այդ վստահության հիմքում  ընկած են մեր կատարած ամենօրյա աշխատանքները, մասնավորապես և առաջնային ես կհամարեմ խաղաղության պայմանագրի նախաստորագրումը։ Դրան զուգահեռ մենք բազմաթիվ աշխատանքներ ենք կատարել, որը ուղղակիորեն ազդում է Հայաստանի Հանրապետության քաղաքացու կյանքի որակի բարձրացման վրա։ Ես վստահ եմ, որ դա տեսնում, գնահատում և իր վստահությունը մեզ տալու է Հայաստանի Հանրապետության քաղաքացին»,–ասաց նա։

Անդրադառնալով լուրերին, որ ՔՊ-ական կանանց մեջ բավականին ակտիվ պայքար է ընթանում ընտրական ցուցակի առաջին համարներում տեղ զբաղեցնելու համար, իրար «ոտքի տակ են փորում», Պալյանն ասաց. «ՔՊ կուսակցությունում, խմբակցությունում չկա ձեր նշած երևույթներից որևէ մեկը։ Առողջ պայքարին մենք, մեր թիմակիցները, բոլորս միշտ կողմնակից ենք եղել։ Ինչ վերաբերում է «ոտքի տակ փորելուն», պիտի ձեզ տխրեցնեմ բայց նման բան չկա բոլորս միասին հաշտ, համերաշխ աշխատում ենք հանուն Հայաստանի։ Մեր խմբակցությունում, կուսակցությունում ամեն ինչ շատ լավ է, նորմալ է, որևէ մեկը որևէ մեկի ոտքի տակը չի փորել և չի փորելու»։